डिफेन्डिङ च्याम्पियन रियल मड्रिडले च्याम्पियन्स लिग फुटबलको विजयी सुरुवात गरेको छ।
यो सिजन समूह ‘एच’ मा परेको युरोपियन च्याम्पियन रियल मड्रिडले साइप्रसको क्लब अपोल निकोसियालाई ३–० ले हराउँदै प्रतियोगितामा विजयी सरूआत गरेको हो।
रियल मड्रिडको जितमा क्रिष्टियानो रोनाल्डोले दुई तथा सर्जियो रामोसले एक गोल गरेका थिए। खेलको १२ औं मिनेटमा रोनाल्डोले गोल गर्दै रियल मड्रिडलाई सुरुवाति अग्रता दिलाएका थिए। पहिलो हाफ १–० को अग्रता लिएको रियल मड्रिडले दोस्रो हाफमा थप दुई गोल गर्यो।
दोस्रो हाफको सुरूआतमै पेनाल्टीबाट गोल गर्दै रोनाल्डोले रियल मड्रिडको अग्रता दोब्बर पारे। ६१ औं मिनेटम रामोसले गोल गरेपछि रियल मड्रिडले ३–० को जित निश्चित गर्यो।
समूह ‘एच’ अन्तर्गतकै खेलमा इंग्लिस क्लब टोटनह्यामले जर्मन क्लब बोरुसिया डर्टमुण्डलाई ३–१ ले हरायो। टोटनह्यामको जितमा ह्यारी केनले दुई तथा सन हेङ–मिनले एक गोल गरे। बोरूसियाका लागि एण्ड्री यार्मोलेन्कोले एक गोल फर्काए। जितपछि टोटनह्यामको पनि तीन अंक नै भएको छ। तर गोल अन्तरका आधारमा टोटनह्याम दोस्रो स्थानमा छ।