रोनाल्डोबिनाको मड्रिड बराबरीमा रोकियो, मार्सेलोलाई रातो कार्ड


स्टार स्ट्राइकर रोनाल्डो बिनै उत्रिएको रियल म्याड्रिड स्पेनिस ला लिगाअन्तर्गत लगातार दोस्रो खेलमा पनि बराबरीमा रोकिएको छ। शनिबार राति भएको लिगको तेस्रो खेलमा लेभान्टेले रियललाई १–१ गोलको बराबरीमा रोकेको हो।

खेलको १२ मिनेटमा लोपेज अल्भारेजको गोलबाट लेभान्टेले अग्रता बनाएको थियो। तर, ३६ मिनेटमा रियलका लागि भाज्क्युले बराबरी गोल फर्काए।

खेल सकिन एक मिनेट बाँकी रहँदा डिफेन्डर मार्सेलोले रातो कार्ड पाएपछि मड्रिडले केही समय १० खेलाडीमा खेल्यो। लेभान्टेका जेफर्सन लेर्मामाथि खराब ट्याकल गरेपछि मार्सेलोले रातो कार्ड पाएका थिए।

सुरुको तीन खेलमा ५ अंक मात्र जोडेको रियल अंक तालिकाको पाँचौ स्थानमा छ। अघिल्लो खेलमा रियललाई भ्यालेन्सियाले २–२ गोलको बराबरीमा रोकेका थियो। पहिलो खेलमा भने रियलले डिर्पोटिभो ला कोरुनालाई ३–० गोलले हराएको थियो।

Share:

© 2017 Setopati Sanchar Pvt. Ltd.