कोलम्बियाले ब्राजिललाई बराबरीमा रोक्यो


रूसमा हुने सन् २०१८ को विश्वकप फुटबलमा स्थान बनाइसकेको ब्राजिल विश्वकप छनोट अन्तर्गत गएरातिको खेलमा कोलम्बियासँग बराबरीमा रोकिएको छ।

दक्षिण अमेरिकी क्षेत्रको छनोट अन्तर्गत बुधबार बिहान भएको खेलमा ब्राजिल कोलम्बियासँग १–१ गोलको बराबरीमा रोकिएको हो।

कोलम्बियाको घरेलु मैदानमा भएको खेलमा सुरूवाती अग्रता जोगाउन नसक्दा ब्राजिल बराबरीमा रोकिएको हो। खेलको ४५ औं मिनेटमा विलियनले गोल गर्दै ब्राजिललाई अग्रता दिलाएका थिए। दोस्रो हाफको ५६ औं मिनेटमा राडमेल फाल्काओले गोल गर्दै खेल १- १ को बराबरीमा ल्याए। त्यसपछि दुवै टोलीले गोल गर्न सकेनन् र खेल बराबरीमा सकियो ।

यो बराबरीपछि दक्षिण अमेरिकी क्षेत्रको छनोटको शिर्ष स्थानमा रहेको ब्राजिलले १६ खेलबाट ३७ अंक जोडेको छ। यस क्षेत्रको छनोटमा कोलम्बिया २६ अंकसहित दोस्रो स्थानमा रहेको छ।

यस समूहबाट शीर्ष चारमा पर्ने टिम विश्वकपका लागि सोझै छनोट हुनेछन्।

Share:

प्रतिकृया दिनुहोस

© 2017 Setopati Sanchar Pvt. Ltd.