डिफेन्डिङ च्याम्पियन जर्मनीले आगामी रूस विश्वकपका लागि भएको छनोट खेलमा अपराजित यात्रा जारी राखेको छ। विश्वकप छनोट अन्तर्गत युरोपियन क्षेत्रको छनोटमा सोमबार राति नर्वेलाई ६-०को फराकिलो अन्तरले पराजित गर्दै जर्मनीले अपराजित यात्रा जारी राखेको हो ।
घरेलु मैदानमा भएको खेलमा जर्मनीलाई जिताउन टिमो वेर्नेरले दुई तथा मोसीट ओजिल, जुलियन ड्रेक्सलर, लियोन गोर्तेज्का र मारियो गोमेजले समान एक एक गोल गरे।
जर्मनीले पहिलो हाफमा नै चार गोलको अग्रता लिएको थियो । १० औं मिनेटमा ओजिलले गोल गर्दै सुरुवाति अग्रता दिलाए । १७ औं मिनेटमा ड्रेक्सलरले अग्रता दोब्बर पारे । वेर्नरले २१ र ४० औं मिनेटमा गरी दुई गोल गरेपछि पहिले हाफमा जर्मनीले ४–० को अग्रता लियो । दोस्रो हाफमा थप दुई गोल भयो । ५० औं मिनेटमा गोरेत्क र ७९ औं मिनेटमा गोमेजले गोल गर्दै जर्मनीका लागि आधा दर्जन गोल पूरा गरे ।
युरोपियन क्षेत्रको छनोटको समूह ‘सी’ मा रहेको जर्मनीको यो लगातार आठौं जित हो । जितपछि जर्मनीले रुसको यात्रा तय गर्ने सम्भावना बलियो बनाएको छ।
समूह ‘सी’ अन्तर्गतकै अर्को खेलमा नर्दन आयरल्याण्डले चेक रिपब्लिकलाई २ – ० ले पराजित गरेको छ । जितपछि दोस्रो स्थानको नर्दन आयरल्याण्डले १९ अंक जोडेको छ । यस्तै यसै समुहको तेस्रो स्थानको अजरबैजानले सान मारियोलाई ५ – १ ले पराजित गरेको छ ।
गएरातिको नतिजासँगै ८ खेलबाट २४ अंकसहित जर्मनी समूहको शीर्ष स्थानमा छ । दोस्रो स्थानमा रहेको नर्दन आयरल्याण्डको १९ अंक छ ।