बेल्जियमले सन् २०१८ मा रुसमा हुने विश्वकपमा छनोटमा आफ्नो स्थान पक्का गरेको छ। विश्वकप छनोट अन्तर्गत युरोपियन क्षेत्रको छनोटमा आइतबार राति भएको खेलमा ग्रिसलाई २-० ले हराउँदै बेल्जियम विश्वकपमा छनोट भएको हो।
ग्रीसको घरेलु मैदानमा भएको खेलमा बेल्जियमलाई जित दिलाउन जान भेर्टोनघेन र रोमेरो लुकाकुले समान एक एक गोल गरेका थिए। पहिलो हाफ गोलरहित बराबरीमा सकिएको खेलमा बेल्जियमले दुवै गोल दोस्रो हाफमा गरेको थियो। खेलको ७० औं मिनेटमा भेर्टोनघेनको गोलबाट बेल्जीयमले गोलको खाता खोलेको थियो । त्यसको चार मिनेटपछि लुकाकुले गोल गर्दै बेल्जियमलाई २-० को जित दिलाए ।
यो जितसँगै समूह एचमा रहेको बेल्जियमले ८ खेलबाट २२ अंक जोड्दै समूहको शीर्ष स्थानमा रहेर विश्वकप यात्रा तय गरेको छ।
योसँगै बेल्जियम विश्वकप छनोट हुने पहिलो युरोपियन राष्ट्र बनेको छ। अहिलेसम्म विश्वकपमा बेल्जियमसहित ब्राजिल, मेक्सिको, इरान र जापानले स्थान पक्का गरेका छन्।