फितलो मिडफिल्डका बीच नेपालले १–० ले हरायो बंगलादेशलाई


विमल घर्तीमगरको निर्णायक गोलको सहयोगले बंगलादेशको युवा टोलीलाई १–० ले पराजित गर्दै नेपालले एएफसी युथ–२३ छनोटको तयारी उत्कृष्ट ढंगले गरेको छ।

राजुकाजी शाक्यको प्रशिक्षणमा मंगलबार मैत्रीपूर्ण खेलमा उत्रिँएको नेपालले २० मिनेटमा कप्तान विमलको एक मात्र गोलको सहयोगले बंगलादेशलाई पराजित गर्यो।

आउँदो शनिवारदेखि सुरु हुने एएफसी युथ–२३ छनोटको तयारी स्वरुप खेलिएको मैत्रीपूर्ण खेलमा नेपालले दोस्रो हाफमा पाएको ३ वटा अवसरलाई गोलमा परिणत गर्न सकेन्। सातदोबाटोस्थित एन्फा कम्प्लेक्समा भएको मैत्रीपूर्ण खेलमा नेपालको मिडफिल्ड तुलनात्मक रुपमा कमजोर देखियो। खेलाडीमा फिटनेशको केही अभाव र सन्तुलन मिलाउन पनि नसकेको देखियो। त्यसमा पनि ३१ मिनेटमा चोटका कारण एक मात्र स्ट्राइकर विमल मैदानबाट बाहिरिन पुगेपछि नेपालको खेल निकै सुस्त देखिन्थ्यो।

विमल २६ मिनेटमा बंगाली गोल पोस्टमा कडा प्रहार गर्ने क्रममा लड्न पुग्दा उनको कुममा चोट लागेको थियो। खेल सकिएपछि पत्रकार सम्मेलनमा उनले आफू सञ्चो भएको र युथ–२३ छनोट खेल्न तयार रहेको स्पष्ट पारे।

नेपालले खेलको सुरुवातमै हेमन गुरुङको पासमा अञ्जनले गोलको अवसर गुमाएका थिए। तर, उनले डिबक्सभित्र बंगाली डिफेन्स नुरुल नाइयुम फैसललाई कटाएर दिएको पासमा ‘अनमार्क’ रहेका विमलले उत्कृष्ट गोल गर्दै नेपाललाई अग्रता दिलाए।

विमल घाइते भएपछि उनको स्थानमा विश्वास श्रेष्ठ मैदान प्रवेश गरेका थिए।

दोस्रो हाफमा खेलमा फर्किन बंगलादेशले कडा प्रयास गरेको थियो। दोस्रो हाफमा जाफर इक्बाललाई मैदान प्रवेश गराएपछि बंगाली खेलाडीले नेपाली गोल पोस्टमा केही दबाब सिर्जना गरेका थिए।

इक्बालले गोलको दुईवटा अवसर खेर फ्याँके। खेलको ५३ मिनेटमा डिबक्स बाहिर राम्रो ‘एंगल’मा बंगलादेशले फ्रिकिकको अवसर पाएको थियो, जब नेपाली गोलरक्षक एलन न्यौपानेले डिबक्स बाहिरको बल हातले तानेका थिए। तर, इक्बालले ‘वाल’ बनाएर बसेका नेपाली खेलाडीको बीचमा बल हान्दै मौका खेर फ्याँके।

यस्तै, ६८ मिनेटमा पनि उनले एक्लो प्रयासमा नेपाली गोल पोस्ट नजिकैबाट हानेको प्रहार गोलरक्षक एलनले जोगाए।

यसअघि ५६ मिनेटमा मोहम्मद जेवाल रानाले नेपाली गोल पोस्टमा उत्कृष्ट फ्रिकिक प्रहार गरेका थिए। तर, दोस्रो बार च्यापेर बसेका डिफेन्डर मोमजुरुर रहमानले हेडिङ गर्न नसक्दा बंगलादेश खेललाई बराबरीमा ल्याउनबाट चुक्यो।

नेपालका लागि ६३ मिनेटमा अञ्जनले उत्कृष्ट प्रहार गरेका थिए। तर, उनको प्रहार रहमानले रोकेका थिए। नेपालले ९० मिनेटपछि थप गरिएको समयमा दुई वटा अवसर प्राप्त गरेको थियो। मिडफिल्डर विवेक बस्नेतले दिएको क्रस पासलाई बंगाली खेलाडीबाट डिबक्समा घेरिएका अन्जनले नियतवश छोडेपछि ‘अनमार्क’ रहेका विश्वास कहाँ बल पुगेको थियो। तर, विश्वासको कडा प्रहार गोल पोस्टबाट दूर्भाग्यपूर्ण रुपमा बाहिरियो।

यस्तै, खेल सकिन केही सेकेन्ड बाँकी रहँदा विश्वासको पासमा पुजन उपरकोटीले हेडिङ गोलको अवसर चुकाएका थिए। पहिलो पल्ट मौका पाएका पुजनले बंगलादेशविरुद्ध उत्कृष्ट खेल खेलेका थिए।

विमलको अनुपस्थितिमा अञ्जनले पनि उत्कृष्ट प्रदर्शन गरे।

बंगलादेशका प्रशिक्षक एन्ड्रयु ओर्डले आफूले अभ्यास गरेर आएको टर्फभन्दा सातदोबाटोको टर्फले बढि बाउन्स लिएको र केही तीब्र भएका कारण खेल्न अफ्ठेरो भएको बताए। उनले पहिलो हाफको खेल आफ्नो नियन्त्रणमा रहे पनि नेपाली स्ट्राइकर विमलका कारण गोल खानु परेको बताए।

बंगलादेश एएफसी युथ–२३ छनोटभन्दा अगाडि कतारविरुद्ध अर्को मैत्रीपूर्ण खेल खेलेर प्यालेस्टायन पुग्ने छ। उसले त्यहाँ समूहचरणको खेलमा प्यालेस्टायन, जोर्डन र ताजकिस्तानविरुद्ध खेल्नेछ।

नेपाली प्रशिक्षक शाक्यले मिडफिल्डमा समस्या देखिएको स्विकार गरे। उनले फिटनेशमा पनि केही समस्या देखिएको बताए। उनले एएफसी युथ–२३ छनोटमा बलियो टोलीसँग खेल्नु पर्ने कारण बंगलादेशविरुद्ध सम्हालिएर खेलेको जानकारी दिए। ‘हामीलाई बंगलादेश कमजोर टोली भएको थाहा थियो। त्यसैले खेलाडीलाई चोट नलागोस भन्नेमा हामी सतर्क थियौं,’ उनले भने।

Share:

प्रतिकृया दिनुहोस

© 2017 Setopati Sanchar Pvt. Ltd.