साफ च्याम्पियनसिप २०२१ अन्तर्गत आफ्नो तेस्रो खेलमा नेपालले भोलि भारतसँग खेल्दैछ।
प्रतियोगितामा नेपाल लगातार दुई जित निकाल्दै शीर्ष स्थानमा छ। भारतले भने सुरुवाती दुई खेलमा जित निकाल्न सकेको छैन।
नेपालले पहिलो खेलमा आयोजक माल्दिभ्स १-० र दोस्रो खेलमा श्रीलंकालाई ३-२ ले पराजित गरेको थियो।
भारत भने बंगलादेशसँग १-१ र श्रीलंकासँग गोलरहित बराबरीमा रोकिएको थियो।
भारतविरूद्धको खेलअघि नेपालका प्रशिक्षक अब्दुल्लाह अलमुताइरीले भारत बलियो टिम भएकाले भारतकै जित्ने सम्भावना बढी रहेको बताएका छन्।
‘भारत दक्षिण एसियाको उत्कृष्ट टिम हो। भारत साफको सात पटकको च्याम्पियन हो। मेरो विचारमा भोलिको खेलमा भारतको जित्ने सम्भावना ९५ प्रतिशत छ,’ उनले खेलअघि भने।
‘फिफा वरीयताको तुलनामा उनीहरू हामीमाथि ६० स्थान माथि छन्। उनीसँग अनुभवी प्रशिक्षक छन्। यसको मतलव हामीले भारतविरूद्ध नलड्ने भन्ने होइन। हामी राम्रो खेल्न कोशिस गर्नेछौं।’
नेपालका कप्तान किरणकुमार लिम्बुले भारतविरुद्धको खेलका लागि राम्रो तयारी गरेको बताए।
‘हामीले भोलिको खेलका लागि राम्रो तयारी गरेका छौ। प्रशिक्षकले भनेको जस्तै भारतविरुद्धको खेल कठिन हुनेछ। हामीले दुई चरण पार गरेका छौं। भोलि अर्को चरण पार गर्नु पर्नेछ। हामी जितका लागि ९० मिनेटसम्म लड्नेछौं,’ उनले भने।
-1746009348.jpg)
