युरोपियन च्याम्पियन्स लिगअन्तर्गत समूह ‘बी’ को खेलमा इंग्लिस क्लब लिभरपुलले सानदार जित हात पारेको छ।
लिभरपुलले एफसी पोर्टोलाई ५-१ गोलले पराजित गरेको छ।
लिभरपुलका लागि सलाह र फिर्मिनोले दुई दुई गोल गरे। सलाहले खेलको १८ र ६० मिनेटमा गोल गर्दा फिर्मिनोले ७७ र ८१ मिनेटमा गोल थपे।
त्यसअघि खेलको ४५ मिनेटमा मानेले लिभरपुलका लागि गोल गरेका थिए।
जितसँगै समूहमा लिभरपुलले ६ अंक जोडेको छ।
यो समूहको अर्को खेलमा स्पेनिस क्लब एट्लेटिको म्याड्रिड विजयी भएको छ। एट्लेटिकोले इटालियन क्लब एसी मिलानलाई २-१ ले पराजित गर्यो।
पुनरागमन जित निकालेको एट्लेटिकोका लागि ग्रिजम्यानले ८४ र सुआरेजले दोस्रो हाफको इन्जुरी टाइमको सातौं मिनेटमा पेनाल्टीबाट गोल गरे।
त्यसअघि मिलानले २० मिनेटमा डा लिएओको गोलबाट अग्रता लिएको थियो। २९ मिनेटमा मिलानका केसीइ दोस्रो पहेँलो कार्ड पाउँदै मैदान बाहिरिदा उसले त्यसपछि १० खेलाडीमा खेल्नु परेको थियो।
समूहमा दोस्रो स्थानमा रहेको एट्लेटिकोको चार अंक भएको छ। तेस्रो स्थानको पोर्टोको एक अंक छ भने मिलानले अंक जोड्न सकेको छैन।
यता समूह ‘डी’ को खेलमा स्पेनिस क्लब रियल म्याड्रिड पराजित भएको छ।
१३ पटकको युरोपियन च्याम्पियन रियललाई माल्डोभाको शेरिफ तिरास्पोलले २-१ गोलले पराजित गरेको छ। खेलको २५ मिनेटमा याख्शिभोइभको गोलबाट शेरिफले अग्रता लियो।
६५ मिनेटमा रियलका करिम बेन्जिमाले पेनाल्टीबाट बराबरी गोल फर्काए।
८९ मिनेटमा थिलले गोल गर्दा शेरिफले फेरि अग्रता लिन सफल भयो।
लगातार दुई जित निकालेको शेरिफ समूह ‘डी’ मा ६ अंक जोड्दै शीर्ष स्थानमा छ। दोस्रो स्थानको रियलको ३ अंक छ।
इन्टर मिलान र शख्तर डोनेट्सले एक एक अंक जोडेका छन्। इन्टर र शख्तरले मंगलबार राति गोलरहित बराबरी खेले।
