युरोपा लिग फुटबल प्रतियोगिताअन्तर्गत इंग्लिस क्लबद्वय म्यानचेस्टर युनाइटेड र आर्सनल क्वार्टरफाइनलमा प्रवेश गरेका छन्।
लिगको अन्तिम १६ को खेलमा म्यानचेस्टरले इटालियन क्लब एसी मिलानमाथि समग्रमा २-१ को जित निकालेर अन्तिम आठमा स्थान पक्का गरेको हो।
पहिले लेगमा १-१ को बराबरीमा सकिएको थियो। बिहीबार भएको दोस्रो लेगमा १-० को जित निकाल्दै म्यानचेस्टरले अन्तिम आठमा स्थान बनायो।
म्यानचेस्टरको जितमा पाउल पोग्बाले खेलको ४८ मिनेटमा गोल गरेका थिए।
यता आर्सनलले ग्रिसको ओलम्पियाकोसलाई समग्रमा ३-२ गोलले पछि पार्यो। पहिलो लेगमा आर्सनल ३-१ गोलले विजयी भएको थियो।
बिहीबार घरेलु मैदानमा भएको खेलमा आर्सनललाई ओलम्पियाकोसले १-० ले हरायो। यद्यपी पहिलो लेगमा हात पारेको जितले आर्सनललाई अन्तिम आठमा पुग्न काफी भयो।
यता अर्को इंग्लिस क्लब टोटेनहम भने अन्तिम १६ बाटै बाहिरिएको छ। टोटेनहमलाई क्रोएसियाको डाइनामो जग्रेबले समग्रमा ३-२ गोलले पछि पार्यो।
पहिलो लेगमा टोटेनहमले २-० को जित हात पारेको थियो। बिहीबार भएको दोस्रो लेगमा डाइनामो ३-० ले विजयी हुँदै अन्तिम आठमा स्थान बनायो।
