लिग आइ–लिग टिम पञ्जाव एफसीमा उत्कृष्ट खेलाडीहरूको जमघट छ। ती मध्ये एक हुन्, ३० वर्षीय गोलकिपर किरणकुमार लिम्बु। किरण नेपााली राष्ट्रिय फुटबल टिमका कप्तान हुन्।
यो सिजन पञ्जावले सुरुवाती दुई खेल मध्ये एकमा जित र अर्को खेलमा हार बेहोरेको छ। पञ्जावले पहिलो खेलमा आइजोललाई १-० गोलले पराजित गरेको थियो।
दोस्रो खेलमा भने पञ्जाव गोकुलम केरलासँग ४-३ ले पराजित भयो। पहिलो हाफमा ३-१ को अग्रता लिए पनि पञ्जावले दोस्रो हाफमा ३ गोल खाएको थियो। सो खेलमा किरणले टिमको कप्तानी गरेका थिए।
पञ्जावले सन् २०१७-१८ को लिग जित्दा किरण पनि टिममा थिए।
तेस्रो सिजन आइ लिग खेलिरहेका किरणले भारतको लिग फुटबलको स्तर दक्षिण एसियाका अन्य देशको भन्दा माथि रहेको बताए। उनले आइ लिग डट ओआरजीसँग कुरा गर्दै सार्क क्षेत्रका खेलाडीका लागि भारत एक्पोजर प्राप्त हुने स्थान भएको बताए।
उनले बाँकी खेलमा पञ्जावका लागि उत्कृष्ट प्रदर्शन गर्ने बताए।
‘लिग सुरु हुनुअघि पहिलो खेल महत्वपूर्ण भएको हामीलाई थाहा थियो। यहाँ हरेक खेलमा कडा प्रतिस्पर्धा हुन्छ। हामीले महत्वपूर्ण मानिएको पहिलो खेलमा राम्रो खेल्यौ र जित्यो। तर दुर्भाग्यवश हामीले दोस्रो खेलमा अग्रता जोगाउन नसक्दा जित निकाल्न सकेनौं। जित हार खेलको पाटा हुन्। हामीले आगामी खेलमा सुधार गर्दै अघि बढ्नु छ,’ उनले भनेका छन्।
‘आइ लिग उपाधि मेरा करिअरको ठूलो उपलब्धि हो। यसले मलाई आत्मविश्वास दिन्छ र भविष्यका लागि प्रेरणा पनि मिल्छ। हरेक खेल प्रतिस्पर्धात्मक हुने आइ लिगमा मेरो टिमलाई च्याम्पियन बनाउन सहयोग गर्नेछु।'
उनले आइ लिगमा अरु नेपाली खेलाडीले अवसर पाउने आसा व्यक्त गरे। नेपाली खेलाडीले भारतमा अवसर पाउनका लागि आफ्नो प्रदर्शनले भूमीका खेल्ने उनको भनाइ छ।
‘नेपाली खेलाडी भारतमा खेल्दा राम्रो लाग्नेछ। यहाँ जति अवसर पाइन्छ त्यति उनीहरुलाई र आउदो पुस्तालाई राम्रो हुन्छ। भविष्यमा ६-७ जना नेपाली खेलाडीले भारतमा अवसर पाएको हेर्न चाहान्छु। त्यसो भए हाम्रो र राष्ट्रिय टिमका लागि धेरै राम्रो हुनेछ,’ किरणको भनाइ छ।
उनले अघि भने,’यदि मैले राम्रो खेले र मेरो टिमलाई आइ लिगमा जित दिलाए भने धेरै नेपाली खेलाडीका लागि भारतमा अवसरको ढोका खुल्नेछ। त्यसैले हरेक खेलमा राम्रो खेल्दै आफ्नो टिमलाई जिताउने प्रयास गर्नेछु।‘
उनले हरेक खेलअघि नेपाली समर्थकले शुभकामना सन्देश पठाउने बताए। त्यस्ता सन्देशले आफूलाई प्रेरणा मिल्ने उनको भनाइ छ।
