लुइस सुआरेजले एट्लेटिको म्याड्रिडमा डेब्यू गर्दा प्रभावशाली खेल देखाएका छन्।
स्पेनिस ला लिगाअन्तर्गत आइतबार भएको खेलमा एट्लेटिकोले ग्रानडालाई ६-१ गोलले पराजित गरेको खेलमा सुआरेजले दुई गोल गर्दा एक एसिस्ट गरे।
दुई दिनअघि मात्र बार्सिलोनाबाट एट्लेटिको म्याड्रिडसँग सम्झौता पूरा गरेका सुआरेज खेलको ७० मिनेटमा डिएगो कोस्टाको स्थानमा मैदान प्रवेश गरेका थिए।
उनले मैदान छिरेको दोस्रो मिनेटमा मार्कोस लोरेन्टेलाई गोलका लागि पास उपलब्ध गराए। सो गोलसँगै एट्लेटिकोले खेलमा ४-० गोलको अग्रता बनाएको थियो।
त्यसपछि सुआरेजले खेलको ८५ मिनेटमा टिमका लागि पाँचौ र व्यक्तिगत पहिलो गोल गरे। इन्जुरी टाइमको तेस्रो मिनेटमा सुआरेजले अर्को गोल गरेका थिए।
त्यसअघि एट्लेटिकोका लागि डिएगो कोस्टाले नवौं मिनेटमा पहिलो गोल गरेका थिए। कोरिआले ४७ मिनेटमा अग्रता दोब्बर पार्दा जोआओ फेलिक्सले ६५ मिनेटमा अर्को गोल गरे।