कोरोना भाइरसका कारण करिब पाँच महिना स्थगित गरिएको युरोपेली च्याम्पियन्स लिगका खेलहरू शुक्रबार रातिबाट सुरू हुँदैछन्।
अन्तिम १६ को दोस्रो लेगका बाँकी चार खेल मध्ये दुई खेल शुक्रबार र दुई खेल शनिबार हुनेछन्।
शुक्रबार राति पौने एक बजे स्पेनिस क्लब रियल म्याड्रिड र इंग्लिस क्लब म्यानचेस्टर सिटीबीच खेल हुनेछ।
घरेलु मैदानमा हुने खेलअघि सिटी फाइदामा छ। किनभने पहिलो लेगमा सिटीले रियललाई २–१ गोलले हराएको थियो।
सिटीको मैदानमा कम्तिमा २ गोल अन्तरमा जित निकाल्नु पर्ने भएकाले रियल दबाबमा छ।
शुक्रबार राति नै इटालियन च्याम्पियन युभेन्ट्स र फ्रेन्च क्लब लियोनबीच खेल हुनेछ।
पहिलो लेगमा १–० ले पराजित भएको युभेन्ट्सलाई पनि घरेलु मैदानमा जित निकाल्नु पर्ने बाध्यता छ।
शनिबार राति नापोली र बार्सिलोना तथा चेल्सी र बायर्न म्युनिखबीच खेल हुनेछ। पहिलो लेगमा बायर्न ३–० ले विजयी हुँदा नापोली र बार्सिलोनाले १–१ को बराबरी खेलेका थिए।
यी खेल सकिएपछि अन्तिम आठका सबै खेल पोर्चुगलको लिस्बनमा अगस्ट १२ देखि हुनेछ।
फाइनल खेल भने अगस्ट २३ मा बेनिफिकाको खेल मैदान एस्टाडियो डा लुजमा हुनेछ।
क्वार्टरफाइनलमा पेरिस सेन्ट जर्मेन (पीएसजी) र एटलान्टा तथा आरबी लेइपजिग र एथ्लेटिको मड्रिडबीच खेल हुने पक्का भइसकेको छ।
अब रियल र म्यानचेस्टर सिटीको विजेताले लियोन र युभेन्ट्सको विजेतासँग खेल्नेछ। यस्तै नापोली र बार्सिलोनाको विजेताले चेल्सी र बायर्न म्युनिखबीच हुने खेलको विजेतासँग खेल्नेछ।
