म्यानचेस्टर युनाइटेडले इंग्लिस प्रिमियर लिगको तेस्रो स्थानमा उक्लने मौका गुमाएको छ।
सोमबार राति भएको खेलमा साउथह्याम्टनसँग २-२ गोलको बराबरीमा रोकिएपछि युनाइटेडले तेस्रो स्थानमा उक्लने मौका गुमाएको हो।
जससँगै शीर्ष चारमा रहेर आगामी सिजनको च्याम्पियन्स लिग खेल्ने म्यानचेस्टरको अभियानमा धक्का लागेको छ।
खेलको अन्त्यसम्म २-१ को अग्रता लिएको युनाइटेडले दोस्रो हाफको इन्जुरी टाइमको छैटौ मिनेटमा गोल खाएको थियो। साउथह्याम्टनका ओबाफेमीले इन्जुरी टाइममा गोल गरेपछि युनाइटेड बराबरीमा रोकिन बाध्य भयो।
खेलमा अग्रता भने साउथह्याम्टनले लियो। आम्स्ट्रङ्गले १२औं मिनेटमा गोल गर्दै आफ्नो टिमलाई पहिले अग्रता दिलाए।
खेलको २०औं मिनेटमा रास्फोडले बराबरी गोल फर्काए। २३ मिनेटमा मार्टियलले गोल गरेपछि युनाइटेडले २-१ को अग्रता लियो।
बराबरीसँगै पाँचौ स्थानमा सीमित बनेको युनाइटेडले ५९ अंक जोडेको छ। चौथो स्थानको लेस्टरको पनि ५९ अंक नै छ। चेल्सी ६० अंक जोडेर तेस्रो स्थानमा रहेको छ।
लिगको उपाधि जितेको लिभरपुलको ९३ अंक र दोस्रो स्थान पक्का गरिसकेको म्यानचेस्टर सिटीको ७२ अंक रहेको छ।