स्पेनिस क्लब बार्सिलोनाका अध्यक्ष जोसेप बार्टोमेउले पूर्व खेलाडी जाभी हर्नान्डेज ढिलोचाँडो बार्सिलोनाका प्रशिक्षक हुने बताएका छन्।
बार्टोमेउले हाललाई भने क्लबको प्रशिक्षकमा किके सेटिन नै रहने बताए। सेटिनलाई आगामी सिजनका लागि पनि क्लबमा राख्ने उनले संकेत दिए।
कोरोना भाइरसअघि अंक तालिकाको शीर्ष स्थानमा रहेको बार्सिलोना अहिले दोस्रो स्थानमा झरेपछि सेटिनको प्रशिक्षणको आलोचना भइरहेको छ। बार्सिलोनाले अंक गुमाउँदा रियल म्याड्रिड लिगको उपाधि जित्ने सँघारमा छ।
बार्सिलोनाले लिगको उपाधि गुमाउने अवस्थामा पुगेपछि सेटिनको विकल्प खोज्नका लागि बार्सिलोना व्यवस्थापनमाथि दबाव परिरहेको छ। कतिपयले पूर्व खेलाडी जाभी बार्सिलोनाको प्रशिक्षक बन्नु पर्ने समेत बताएका थिए।
जाभी सन् २०१९ देखि कतारको अल साद स्पोर्ट्स क्लबको प्रशिक्षक छन्।
यहि सन्दर्भमा क्लबका अध्यक्ष बार्टोमेउले जाभी बार्सिलोनाको भावी प्रशिक्षक भएको बताएका हुन्। तर उनले अहिलेका प्रशिक्षक सेटिङ आगामी सिजनसम्म बार्सिलोनामा बस्ने बताए। बार्टोमेउ र सेटिङबीच आगामी सिजनको योजनाको विषयमा छलफल समेत भएको बताइएको छ।
'जाभी ढिलोचाँडो बार्सिलोनाको प्रशिक्षक हुन्छन्। तर अहिले हामी प्रशिक्षक खोजिरहेका छैनौ,' उनले टिभी-३ लाई अन्तर्वार्ता दिँदै भनेका छन्,'हामीले सेटिङकै घरमा गएर कुरा गरिसकेका छौं। आगामी सिजनका लागि योजना बनाएका छौं। उनी सम्भवत प्रशिक्षक रहिरहन्छन्। मलाई उनको योजना चाख लागेको छ।'