बार्सिलोनाका फरवार्ड लिओनल मेसी स्पेनिस ला लिगाको एकै सिजनमा २० गोलभन्दा बढी र २० एसिस्ट गर्ने पहिलो खेलाडी बनेका छन्।
शनिबार बार्सिलोनाले रियल भालडोलिडलाई १-० ले पराजित गर्ने क्रममा अर्टुरो भिदालले गोल गरेका थिए। अर्जेन्टाइन सुपरस्टार मेसीले सो गोलका लागि पास उपलब्ध गराएका थिए।
यसअघि सन् २००८-०९ को सिजनमा बार्सिलोनाका मिडफिल्डर जाभीले २० एसिस्ट गरेका थिए। तर ला लिगामा एकै सिजनमा २० भन्दा बढी गोल र २० एसिस्ट कुनै पनि खेलाडीले गरेका थिएनन्।
युरोपका पाँच शीर्ष लिगको एकै सिजनमा २० भन्दा बढी गोल र २० एसिस्ट गर्ने मेसी दोस्रा खेलाडी बने। यसअघि थेयरी हेनरीले सन् २००२-०३ को इंग्लिस प्रिमियरमा यो रेकर्ड बनाएका थिए।
थेयरीले सो सिजनमा आर्सनलका लागि २४ गोल गर्दा २० एसिस्ट गरेका थिए।
जारी सिजनमा मेसीले २२ गोल गरिसकेका छन्। उनलाई पछ्याइरहेका रियल म्याड्रिडका करिम बेन्जिमाले १८ गोल गरेका छन्।
