इटालियन सिरि 'ए' को उपाधि दौडमा रहेको युभेन्ट्स शनिबार राति भएको खेलमा बराबरीमा रोकिएको छ। अंक तालिकाको शीर्ष स्थानमा रहेको युभेन्ट्सलाई तेस्रो स्थानको एटलान्टाले २-२ गोलको बराबरीमा रोकेको हो।
खेलको १६ मिनेटमा एटलान्टाले अग्रता लियो। उसका लागि जापाटाले गोल गरेका थिए।
५५ मिनेटमा युभेन्ट्सले पेनाल्टीमार्फत गोल फर्कायो। युभेन्ट्सका स्ट्राइकर क्रिस्टियानो रोनाल्डोले पेनाल्टीमा गोल गरेका हुन्।
८० मिनेटमा एटलान्टाले खेलमा दोस्रो पटक अग्रता लियो। उसका लागि मलिनोभस्कीले गोल गरेका थिए।
तर खेलको अन्तिम मिनेटमा युभेन्ट्सले पेनाल्टीमा गोल गर्दै सम्भावित हार टार्यो। युभेन्ट्सका लागि यसपटक पनि रोनाल्डोले पेनाल्टीमा गोल गरे।
रोनाल्डोले सिजनको लिगका २८ खेलमा २८ गोल गरेका छन् भने युभेन्टसका लागि सबै प्रतियोगितामा गरी ३२ गोल गरिसकेका छन्।
यता दोस्रो स्थानको लाजियो पराजित भएको छ। लाजियोलाई सासउलोले २-१ गोलले हराएको फाइदा शीर्ष टिम युभेन्ट्सलाई पुग्यो।
लिगमा युभेन्ट्सले ३२ खेलबाट ७६ अंक जोडेको छ भने दोस्रो स्थानको लाजियोको ६८ अंक छ। एटलान्टा ६७ अंक जोडेर तेस्रो स्थानमा छ।
