लिओनल मेसीले एकपछि अर्को कोसेढुंगा पार गर्ने क्रम जारी छ।
मंगलबार मेसीले करिअरको ७०० औं गोलको कोसेढुंगा पार गरे। स्पेनिस क्लब बार्सिलोनाका अर्जेन्टाइन फरवार्ड मेसीले ६००औं गोल पूरा गरेको १४ महिनापछि अर्को कोसेढुंगा पार गरेका हुन्।
मंगलबार मेसीले ला लिगाको खेलमा एट्लेटिकोविरुद्ध ७०० गोल पूरा गर्दा बार्सिलोना २-२ गोलको बराबरीमा रोकियो।
यससँगै मेसी ७००औं गोलको क्लबमा प्रवेश गरे। मेसी व्यवसायीक करिअरमा ७०० गोल पूरा गर्ने सातौं खेलाडी बने।
मेसीले ७०० मध्ये ७० गोल अर्जेन्टिनाका लागि गर्दा क्लबका लागि ६३० गोल गरे।
अहिलेसम्म सर्वाधिक गोल गर्ने कीर्तिमान चेक र अस्ट्रियाका लागि खेलेका जेसेफ बिकनको नाममा छ। उनले ८०५ गोल गरेका थिए। दोस्रो स्थानमा ब्राजिलका रोमारियो छन्। उनले ७७२ गोल गरेका थिए। ब्राजिलकै पेले ७६७ गोल गरेर तेस्रो स्थानमा छन्।
हंगेरीका लिजेन्ड पुस्कासले ७४६ गोल गरेका थिए। उनी करिअरमा सर्वाधिक गोल गर्ने सूचीमा चौथो स्थानमा छन्। पाँचौ स्थानमा जर्मनीका गेर्ड मुलर छन्। उनले ७३५ गोल गरेका थिए।
मेसीका समकालीन प्रतिद्वन्द्वी क्रिस्टियानो रोनाल्डो छैटौं स्थानमा छन्। उनले गत अक्टोबरमा युरोकपको छनोट खेलमा युक्रेनविरुद्ध ७००औं गोल गरेका थिए। त्यसयता उनले २६ गोल गरिसकेका छन्।
मेसीले एक वर्षको क्यालेन्डरमा ११ पटक ४० भन्दा बढी गोल गरेका छन्। यस्तै नौ पटक ५० भन्दा बढी गोल गरेका छन्।
सन् २०२० मेसीले ११ गोल मात्र गरेका छन्। कोरोनाभाइरसका कारण तीन महिना फुटबल ठप्प हुँदा यो वर्ष मेसीको गोल संख्या घटेको हो।
मेसीले करिअरमा ला लिगाका ४० क्लबविरुद्ध खेलका छन्। जसमा उनी तीन वटा क्लबविरुद्ध मात्र गोल गर्न चुकेका छन्। सेरिस, रियल मुर्सिया र कार्डिजविरुद्ध मेसीले गोल नगर्दा बाँकी ३७ क्लबविरुद्ध गोल गरेका छन्। उनले सर्वाधिक गोल सेभिल्लाविरुद्ध ३७ गोल गरेका छन्।
मेसीले गरेका ७०० गोल मध्ये देब्रे खुट्टाले गरेका गोल बढी छन्। उनले देब्रे खुट्टाले ५८२ गोल गरेका छन् ९२ गोल दाहिँने खुट्टाबाट भएका छन्।
उचाइ कम भएकाले मेसीले हेड गोल भने कम गरेका छन्। ७०० मध्ये उनले २४ गोल हेडमार्फत गरेका थिए।
हेड बलमा क्लिनिक फिनिसिङ गर्ने मेसीले ५२ पटक फ्रिकिङबाट गोल गरेका छन्। यस्तै उनले गरेका ७०० गोल मध्ये ९० गोल पेनाल्टीबाट भएका छन्।
मेसी बढी गोल डिबक्स भित्रबाट गरेका छन्। डिबक्स भित्रबाट ५८० गोल गर्दा १२० गोल डिबक्स बाहिरबाट गरेका छन्।