नेपालका स्टार फुटबलर रोहित चन्द इन्डोनेसियाबाट नेपाल फर्किएका छन्।
इन्डोनेसियाको माथिल्लो डिभिजनको लिग–वान कोरोना भाइरसका कारण अनिश्चित बनेपछि रोहित स्वदेश फर्किएका हुन्। कोरोनाका कारण इन्डोनेसियाको लिग वान गत मार्चदेखि अनिश्चितकालका लागि स्थगित भएको थियो।
रोहित गत शुक्रबार मलेसियाबाट नेपाल एयरलाइन्सबाट नेपाल फर्किएका हुन्। त्यसअघि उनी इन्डोनेसियाबाट मलेसिया आएका थिए।
नेपाल आउनुअघि उनले कोरोनाको पिसिआर परीक्षण गराएका थिए। परीक्षणको नतिजा नेगेटिभ आएको चन्दले सेतोपाटीलाई जानकारी दिए।
स्वदेश फर्किएका चन्द अहिले घरमै १४ दिनको सेल्फ क्वारेन्टिनमा बसेका छन्।
चन्द इन्डोनेसियन राजधानी जाकर्ताको क्लब पेर्सिजामा आबद्ध छन्। कोरोना कारण लिग स्थगित भएपछि रोहित तीन महिना इन्डोनेसियामै बसेका थिए।
गत फेब्रुअरीमा सुरु भएको लिगका तीन चरणका खेल नसकिदै लिग स्थगित भएको थियो। पेर्सिजाले भने दुई खेल खेलेको थियो। जसमा उसले एक खेलमा जित र एक खेलमा हार बेहोरेको थियो।
स्थगित लिग आगामी सेप्टेम्बरको अन्त्य वा अक्टोबरको सुरुमा सुचारू गर्ने सम्भावना छ। अझै तीन महिनासम्म लिग सुरु नहुने भएपछि रोहित नेपाल फर्किएका हुन्। लिग सुरु हुने पक्का भएपछि रोहित फेरि इन्डोनेसिया जानेछन्।
रोहितले यहि सिजन पेर्सिजा जाकर्तासँग थप २ वर्षको सम्झौता गरेका थिए। रोहित र पेर्सिजाबीच गत जनावरी १५ देखि लागु हुने सम्झौता भएको थियो।
गत वर्ष उनी मासिक करिब १० लाख रुपैयाँ (झण्डै ९ हजार अमेरिकी डलर) पेर्सिजामा आबद्ध भएका थिए। यो सिजन उनले गत वर्ष भन्दा बढी रकम लिने गरी सम्झौता गरेका थिए।
रोहितले गत सिजनमा ३७ खेल खेलका थिए। उनले २ गोल गर्दा २ पास गोलका लागि दिएका थिए।
रोहित सन् २०१७ देखि पेर्सिजामा आबद्ध छन्। नयाँ सम्झौतासँगै उनी २०२२ को जनावरीसम्म पेर्सिजामा रहनेछन्।
पेर्सिजाले २०१८ को इन्डोनेसिया लिग वान पनि जित्न सफल भएको थियो। पेर्सिजनाको उपाधिमा रोहितले उत्कृष्ट खेलेका थिए। जसकारण उनले लिग-१ को सर्वोत्कृष्ट खेलाडीको उपाधि समेत जिते।
रोहितले यसअघि सन् २०१३ देखि २०१५ सम्म पेर्सिजाबाटै खेलेका थिए। २०१६ को सिजन गुमाएका रोहित २०१७ फेरि पेर्सिजामा आबद्ध भएका थिए।
एन्फा एकेडेमिका उत्पादन रोहितले सन् २००९ मा व्यवसायिक फुटबल खेल्न सुरु गरेका थिए।
मच्छिन्द्र क्लबमा आवद्ध भएर करिअर सुरु गरेका उनी पहिलो सिजनमै उत्कृष्ट डिफेन्डर घोषित भए। मच्छिन्द्र त्यो सिजनमा ब्रिटिश गोर्खा कपको सेमिफाइनल सम्म पनि पुगेको थियो।
रोहित सन् २०१० मा भारतीय क्लब हिन्दुस्तान एरोनोटिक्स् लिमिटेड एससीमा अनुबन्धित भए। क्लबले रोहितलाई मासिक १ लाख २८ हजार रूपैयाँमा अनुबन्ध गरेको थियो।
२०१२ मा रोहित इन्डोनेसिया पुगे। त्यतिबेला उनले एफसी पेकन्बरूमा सम्झौता गरेका थिए। एक सिजन इन्डोनेसियामा खेलेपछि उनी एफसी भेस्ट्स्जेल्याण्डमा आबद्ध भए। त्यहाँ ६ महिना बिताएपछि रोहित इन्डोनेसियाको पेर्सिजा जार्कतामा आवद्ध भएका थिए।
२ सिजन जाकार्ता बिताएपछि रोहितले सन् २०१५ मा मलेसियन क्लब टि–टिम एफसी र २०१६ मा मनाङ मस्याङ्दी क्लबबाट खेले।
नेपाली राष्ट्रिय टिममा सन् २००९ मा डेब्यू गरेका उनले अहिलेसम्म ६० अन्तर्राष्ट्रिय क्याप जितिसकेका छन्।
