इटालियन सिरि 'ए' मा उपाधि होडमा रहेको लाजियो पराजित भएको छ। अंक तालिकाको दोस्रो स्थानमा रहेको लाजियोलाई बुधबार भएको खेलमा एटलान्टाले ३-२ गोलले पराजित गरेको हो।
एटलान्टाले २-० गोलले पछि परेको स्थिति उल्टाएर रोमाञ्चक जित हात पारेको हो। पाँचौ मिनेटमा डे रुनले आफ्नै पोस्टमा गोल गर्दा लाजियोलाई फाइदा पुगेको थियो। ११ मिनेटमा मिलिनकोभिक साभिकले गोल गरेर लाजियोको अग्रता दोब्बर पारे।
एटलान्टका लागि ३८ मिनेटमा गोसेन्सले, ६६ मिनेटमा मलिनोभिस्की र ८० मिनेटमा पालोमिनोले गोल गरेका थिए।
यता तेस्रो स्थानको इन्टर मिलानलाई सासुउओलोले ३-३ गोलको बराबरीमा रोकेको छ। रोमाले भने साम्पडोरियालाई २-१ ले पराजित गरेको छ।
दोस्रो स्थानको लाजियो हारेपछि शीर्ष स्थानको युभेन्ट्सको अग्रता ४ पुगेको छ।
युभेन्ट्सले २७ खेलबाट ६६ अंक जोड्दा लाजियोको समान खेलबाट ६२ अंक छ। तेस्रो स्थानको इन्टरको ५८, चौथो स्थानको इन्टरको ५८ र पाँचौ स्थानको रोमाको ४८ अंक रहेको छ।
