युभेन्ट्सका फरवार्ड क्रिस्टियानो रोनाल्डो 'इटालियन सिरि ए' मा बढी गोल गर्ने पोर्चुगिज खेलाडी बनेका छन्।
यसअघि सिरि एमा सर्वाधिक गोल गर्ने पोर्चुगिज खेलाडीको रेकर्ड रुई कोस्टाको नाममा थियो। कोस्टाको कीर्तिमान तोड्ने क्रममा रोनाल्डोले सोमबार बोलोग्नाविरुद्ध गोल गरे।
पेनाल्टीमार्फत गरेको सो गोल रोनाल्डोको जारी सिजनको लिगको २२औं गोल हो। उनले गत सिजन २१ गोल गरेका थिए।
सन् २०१८ मा स्पेनिस क्लब रियल म्याड्रिडबाट इटालियन क्लब युभेन्ट्स आएका ३५ वर्षीय रोनाल्डोले अहिलेसम्म ४३ गोल गरिसकेका छन्। जससँगै कोस्टाको नाममा रहेको ४२ गोलको रेकर्ड तोडिएको छ।
कोस्टाले सन् १९९४ देखि २००६ मा सिरि ए खेलेका थिए। कोस्टाले सुरुमा फ्लोरेन्टिना र पछि एसी मिलानबाट खेलेका थिए।
रोनाल्डो इंग्लिस प्रिमियर लिगमा पनि सर्वाधिक गोल गर्ने पोर्चुगिज खेलाडी हुन्। उनले म्यानचेस्टर युनाइटेडका लागि १९६ खेलमा ८४ गोल गरेका थिए।
ला लिगामा रोनाल्डोको नाममा कीर्तिमान छ। उनी ला लिगामा पनि सर्वाधिक गोल गर्ने पोर्चुगिज हुन्।
उनले रियल म्याड्रिडबाट ला लिगा खेल्दै २९२ खेलमा ३११ गोल गरेका थिए। यो गोल पोर्चुगिज खेलाडीको मात्र नभएर ला लिगा इतिहासकै रेकर्ड हो।
रोनाल्डो ला लिगामा सर्वाधिक गोल गर्ने खेलाडीको सूचीमा दोस्रो स्थानमा छन्। ला लिगामा बढी गोल गर्ने कीर्तिमान बार्सिलोनाका फरवार्ड लिओनल मेसीको नाममा छ।
सिजनको लिगमा २२ गोल गरे पनि रोनाल्डोको प्रदर्शनमा असन्तुष्टि व्यक्त गरिदै आइएको छ। कोप्पा इटालियाको सेमिफाइनलअन्तर्गत एसी मिलानविरुद्धको खेलमा उनले पेनाल्टी मिस गरेका थिए।
फाइनलमा पनि उनले नापोलीविरुद्ध प्रभावकारी खेल देखाउन सकेनन्। जसका कारण नापोलीले युभेन्ट्सलाई पराजित गर्दै उपाधि जित्यो।
इटालीका पूर्व खेलाडी लुका टोनीले रोनाल्डोले कोप्पा इटालियाको सेमिफाइनलमा गरेको प्रदर्शन औषत भएको बताएका थिए।
लगत्तै रोनाल्डोकी बहिनीले इन्स्टाग्राममा पोस्ट गरेर सधैं रोनाल्डोले मात्र टिमलाई जिताउन पर्छ भनेर सोच्न नहुने प्रतिक्रिया दिएकी थिइन्।
कोप्पा इटालियाको फाइनलमा पराजित भएपछि रोनाल्डो नाममा खराब कीर्तिमान बनेको थियो। रोनाल्डोले करिअरमा पहिलो पटक लगातार दुई फाइनलमा पराजय भोगेका थिए।