अखिल नेपाल फुटबल संघ (एन्फा) ले वरिष्ठ उपाध्यक्ष पंकजविक्रम नेम्बाङ र केन्द्रीय सदस्य दावा लामालाई दिइएको जिम्मेवारी खोसेकोमा प्रदेश नम्बर एक फुटबल संघले असन्तुष्टि व्यक्त गरेको छ।
एन्फामा पछिल्लो सयम आन्तरिक कलह बढेपछि प्रदेश एकले सोमबार इटहरीमा बैठक राखेको थियो।
आन्तरिक विवाद हुँदा एन्फामा असहजता आएको र फुटबल विकासको रोडम्यापमा असर गरेकोमा भन्दै प्रदेश एकको गम्भीर ध्यानाकर्षण भएको अध्यक्ष किशोर राईले बताए।
'एन्फाको पछिल्लो विवाद र पदाधिकारीको जिम्मेवारी खोसेकोमा प्रदेश एकको गम्भीर ध्यानाकर्षण भएको छ,' अध्यक्ष राईले भने,'यस्ता किसिमका गल्तीहरु दोहोर्याउन हुन्न भन्ने हाम्रो भनाइ हो।'
अध्यक्ष राईले विवाद समाधानका लागि प्रदेश फुटबल संघको एक टोली काठमाडौं आउने पनि बताए।
'हाम्रो एक टिम काठमाडौं आएर विवाद मिलाउन लागि सबैलाई आग्रह गर्छौं,' उनले भने।
विवाद गर्नु भन्दा 'चेन्ज एन्फा' अभियानका दौरान उठाइएका सामूहिक नेतृत्व, सुशासन, आर्थिक पारदर्शिताका एजेन्डामा एन्फा केन्द्रित हुनुपर्ने राईको भनाइ छ।
यसअघि गत बुधबार एन्फाले वरिष्ठ उपाध्यक्ष नेम्बाङलाई दिइएको पदपूर्ति समिति र सदस्य संघ समितिको संयोजकको जिम्मेवारी खोसेको थियो।
नेम्बाङलाई दिइएको सदस्य संघ समितिको जिम्मेवारी खोस्दै अर्का उपाध्यक्ष वीरबहादुर खड्कालाई संयोजक तोकिएको थियो भने पदपूर्तिको समितिको जिम्मेवारी शिक्षित पराजुलीलाई दिइएको थियो।
एन्फाले फुटसल कमिटी संयोजक रहेका लामालाई जिम्मेवारीमुक्त गर्दै केन्द्रीय सदस्य रत्नकुमार श्रेष्ठलाई संयोजक तोकेको थियो।
जिम्मेवारी खोसिएका नेम्बाङ र लामा दुवैले एन्फा अध्यक्ष कर्माछिरिङ शेर्पाको कार्यशैलीको विरोध गर्दै आएका थिए। पछिल्लो समय राष्ट्रियताको विषयमा अध्यक्ष शेर्पाले दिएको अभिव्यक्ति विवादित बनेपछि दुवैले राजीनामा मागेका थिए।
