एट्लेटिको म्याड्रिड स्पेनिस ला लिगाको तेस्रो स्थानमा उक्लिएको छ। शनिबार भएको खेलमा रियल भालडोलिडमाथि कठिन जित निकालेर एट्लेटिको तेस्रो स्थानमा उक्लिएको हो।
एट्लेटिकोले १-० को जित निकालेको हो। एट्लेटिकोको जितमा वैकल्पिक खेलाडी भिटोलोले गोल गरे। जितसँगै तेस्रो स्थानमा उक्लिएपछि एट्लेटिको च्याम्पियन्स लिगमा स्थान बनाउने अभियान बलियो बन्दै गएको छ।
एट्लेटिकोले ३० खेलबाट ५२ अंक जोडेको छ। एट्लेटिकोसँग गोलअन्तरमा पछि परेको चौथो स्थानको सेभियाको पनि समान खेलबाट ५२ अंक नै छ।
एट्लेटिको र सेभियालाई पछ्याइरहेको पाँचौ स्थानको गेटाफेको ४८ अंक छ।
शीर्ष स्थानको बार्सिलोनाको ६५ अंक छ भने एक खेल कम खेलेको दोस्रो स्थानको रियल म्याड्रिडको ६२ अंक छ।
रियलले आइतबार रियल सोसिडाडसँग खेल्दैछ। खेलमा जित हात पारे रियल म्याड्रिडले शीर्ष स्थानको बार्सिलोनासँग अंक बराबरी गर्नेछ।
