प्रि-सिजनको मैत्रीपुर्ण खेलमा चेल्सीले स्पेनिस ला लिगा च्याम्पियन बार्सिलोनालाई पराजित गरेको छ । जापानमा मंगलबार बेलुका भएको खेलमा चेल्सीले बार्सिलोनालाई २–१ ले पराजित गरेको हो ।
चेल्सीको जितमा टामी अब्राहम र रोस बार्क्लीले गोल गरेका थिए । यस्तै बार्सिलोनाका लागि एकमात्र गोल इभान रेकिटिकले फर्काए ।
चेल्सीले खेलको पहिलो हाफको ३४ औं मिनेटमा अब्राहमले गरेको गोलमा अग्रता लिएको थियो।
त्यस्तै चेल्सीले सो अग्रतालाई खेलको ८१ औं मिनेटमा दोब्बर पारेको थियो। सो गोल रोसले गरे।
यसरी २-० ले पछि परेको बार्सिलोनाले खेलको अतिरिक्त समयको पहिलो मिनेटमा गोल फर्काएको थियो। सो गोल रेकिटिकले हानेका थिए।
बार्सिलोना आफ्ना नियमित कप्तान तथा स्ट्राइकर मेसीबिना नै मैदानमा उत्रेको थियो।
