फ्रन्च क्लब पेरिस सेन्ट जर्मेन (पिएसजी)का खेल निर्देशक लियोनार्दोले सबैलाई उपयुक्त प्रस्ताव आएमा ब्राजिलियन स्टार स्ट्राइकर नेइमार जुनियरले क्लब छाड्न सक्ने बताएका छन्
सोमबारबाट सुरू भएको प्रि-सिजन प्रशिक्षणमा नेइमार उपस्थित नभएपछि क्लबले त्यसमा उपयुक्त कदम चाल्ने बताएको छ।
पछिल्लो समय २७ वर्षिय नेइमार आफ्नो पूर्व क्लब बार्सिलोना फर्किने चर्चा छ।
लियोनार्दोले नेइमारका लागि कुनै ठोस प्रस्ताव नआएको स्पष्ट पारेका छन्। उनले बार्सिलोनासँग त्यसबारेमा सामान्य कुरामात्रै भएको बताए।
सन् २०१७ मा नेइमार बार्सिलोनाबाट २ सय २२ मिलयन युरोको कीर्तिमानी मूल्यमा पिएसजी आएका थिए।
'सबैलाई स्पष्ट छ। तर फुटबलमा आज एउटा कुरा भनिन्छ, भोलि अर्को। यो रोचक छ तर त्यस्तै नै होला', नेइमारले क्लब छाड्न चाहेका हुन् भन्ने प्रश्नको उत्तरमा लियोनार्दोको जवाफ थियो।
उनले नेइमारसँग कुरा भएपनि विस्तृत कुरा सार्वजनिक गर्ने नचाहेको बताए।
'हामीले उसको कर्मचारीसँग पनि कुरा गरेका छौ। सबैलाई सबै कुरा थाहा छ। सबैको कुरा स्पष्ट छ', उनले भने, 'तर आज पनि एउटा कुरा के हो भने उनीसँग अझै ३ वर्ष यहाँ बस्न सक्ने सम्झौता छ। हामीले कुनै प्रस्ताव नपाएको हुनाले, अहिले नै केहि छलफल गरिहाल्न सकिदैन।'
'सबैलाई मिल्ने प्रस्ताव भए नेइमारले पिएसजी छोड्न सक्छन', उनले थपे, 'तर आजको मितिमा उसलाई कसले, कुन मूल्यमा किन्न चाहन्छ, हामीलाई थाहा छैन। सत्य के हो भने सबै कुरा एकैदिनमा हुँदैन।'
कता छन् त नेइमार?
सोमबारबाट सुरू भएको प्रि-सिजनको प्रशिक्षणमा नआएका नेइमार ब्राजिलमै रहेको खुलेको छ। च्यारिटी सम्बन्धी पूर्वनिर्धारित कामका कारण नेइमार प्रशिक्षणमा उपस्थित हुन नसकेको बताइन्छ।
पिएसजी प्रशिक्षणमा नआए पनि ब्रिटिस मिडियाहरूले क्लबलाई नेइमार कहाँ छन् भन्ने बारेमा जानकारी रहेको जनाएका छन्।
उनीहरूले नेइमारका बाबुको हवाला दिदैं आफ्नो समाचारमा लेखेका छन्।
'कारण सबैलाई थाहा छ, यो वर्षदिन अगाडिदेखिको योजना हो। यो नेइमार इन्सिट्यूट गतिविधिमा उनको हिस्सा अन्तरगत भइरहेको छ' नेइमारका पिताले ब्राजिलको फक्स स्पोर्ससँग भनेका छन्।
'हामीले त्यसलाई स्थगित गर्न सकेनौ, उनी जुलाई १५ मा पिएसजी फर्किनेछन्।'
नेइमारका बाबुले यस्तो बताए पनि निर्देशक लियोनार्दोले यी मितिमा कल्बको कुने सहमति नभएको बताए।
