मैत्रीपूर्ण खेलमा नेपाल मलेसियासँग २-० ले पराजित भएको छ। आइतबार मलेसियाको बुकित जलिल रंगशालामा भएको खेलमा नेपाल पराजित भएको हो।
नेपालले दुबै गोल खेलको दोश्रो हाफमा खाएको हो।
नेपालविरूद्ध मलेसियाले पहिलो अग्रता खेलको ५० औं मिनेटमा पेनाल्टी मार्फत लिएको थियो।
डिफेन्डर अनन्त तामाङले फल गरेपछि मलेसियाले पेनाल्टीको पाएको थियो। मलेसियाका लागि सो गोल मोहमद रसिदले गरे।
त्यसैगरी मलेसियाका लागि दोश्रो गोल खेलको ८१ औं मिनेटमा सहारुल मोहमद सादले हेडमार्फत गरे।
फिफा वरियतामा नेपाल मलेसियाभन्दा माथि रहेको छ। नेपाल फिफा वरियतामा १६१ औं स्थानमा छ भने मलेसिया १६८ औं मा।
नेपालले अब आफ्नो दोश्रो मैत्रीपूर्ण खेल जेठ २३ गते चाइनिज ताइपेइसँग खेल्नेछ।
