अखिल नेपाल फुटबल संघ (एन्फा)ले साफ महिला च्याम्पियनसिप २०१९ मा उपविजेता बनेको नेपाली राष्ट्रिय महिला टोलीलाई जनही एक लाख रुपैयाँ नगद पुरस्कार दिने घोषणा गरेको छ।
शनिबार विराटनगरमा बसेको एन्फाको १८ औं वार्षिक साधारणसभाले सो निर्णय गरेको हो। पत्रकार सम्मेलन गर्दै एन्फाका प्रवक्ता एवं केन्द्रीय सदस्य किरण राईले यसको जानकारी दिएका हुन्।
यस्तै विराटनगर महानगरपालिकाले पनि नेपाली टोलीका खेलाडी तथा अफिसियलहरुलाई जनही ५० हजार रुपैया प्रदान गर्ने घोषणा गरेको छ। महानगरका मेयर भीम पराजुलीले खेलाडीहरुको स्तरउन्नतिका लागि पुरस्कृत गरिएको बताए।
शुक्रबार सम्पन्न साफमा नेपाली टोली भारतसंग तीन एक गोल अन्तरले पराजित हुदै दोश्रो स्थानमा सिमीत बनेको थियो।
यसैगरी एन्फाले साधारणसभापछि आयोजना गरेको पत्रकार सम्मेलनमा प्रवक्ता राईले साधारणसभाले एन्फा विधानको धारा २४ को उपधारा ५ मा रहेको पुरानै प्रावधानलाई अनुमोदन गरेको जानकारी दिए।
यसअघि, केन्द्रीय पदाधिकारीहरु जिल्लावाट मताधिकारसहित साधारणसभामा जाँदा केन्द्रीय प्रतिनिधिवाट राजीनामा दिनुपर्ने पुरानो प्रावधान थियो।
त्यसैगरी सभाले आगामी एक वर्षको लागि २३ करोड ७४ लाख ५० हजार रुपैयाको बजेटलाई परिमार्जन सहित स्विकृत गरेको छ। सभाले खोटाङ, नवलपुर र मनाङ जिल्लामा जिल्ला फुटवल संघ गठन गरी फुटबल खेलको विकास र विस्तार गर्ने र ती जिल्लालाई एक वर्षसम्मको लागि पर्यवेक्षकका रुपमा अस्थायी सदस्यता प्रदान गर्ने सभाले निर्णयसमेत गरेको छ ।
