युरोकप २०२० छनौट चरण अन्तरगत शुक्रबार भएको खेलमा इङ्ल्याण्डले चेक गणतन्त्रलाई ५-० ले स्तब्ध पारेको छ। सो खेलमा रहिम स्ट्रलिङले ह्याट्रिक प्रहार गरेका थिए।
विम्बलेमा भएको समूह 'ए' अन्तरगतको खेलमा स्ट्रलिङले खेलको २४ औं मिनेटमा टोलीलाई अग्रता दिलाएका थिए। त्यसैगरी चेकलाई पहिलो हाफको समाप्तिमा २-० ले पछि पार्ने क्रममा हेरी केनले खेलको अतिरिक्त समयको दोश्रो मिनेटमा टोलीका लागि दोश्रो गोल गरेका थिए।
चेकका डिफेन्डरद्वय काडरबेक र कलासले स्टर्लिङ्गलाई लडाएपछि इङ्ल्याण्डले पेनाल्टी पाएको थियो।
त्यसैगरी दोश्रो हाफमा इङ्ल्याण्डका लागि तेश्रो गोल स्ट्रलिङले ५३ औं मिनेटमा गरे भने खेलको ६२ औं मिनेटमा टोलीका लागि चौथो गोल गर्दै आफ्नो ह्याट्रिक पूरा गरे।
यो इङ्ल्याण्डका लागि उनले गरेको पहिलो ह्याट्रिक हो।
त्यसैगरी ४-० ले अगाडी रहेकको इङ्ल्याण्डले खेलको ८४ औं मिनेटमा एक गोल उपहार पायो। चेकका टोमसले सो आत्मघाती गोल गरेका थिए।
यस्तै यसै समूह बुल्गेरिया र मोण्टेनगरोबीचको खेल १-१ को बराबरीमा टुङ्गिएको छ।