१९ वर्षपछि पहिलो पटक एक आपसमा भिडेका नेपाल र कुवेतबीचको खेल गोलरहित बराबरीमा टुङ्गिएको छ। योहान कालिनले प्रशिक्षकको भूमिका सम्हालेपछि पहिलो अन्तराष्ट्रिय खेलमा नेपाल कुवेतसँग भिडेको हो
बराबरीमा नेपालका गोल रक्षक किरण चेम्जोङ्को प्रदर्शन उत्कृष्ट रह्यो। खेल अवधिभर नेपाललाई दबाबमा राखेको कुवेतका दर्जनबढि प्रहारलाई उनले उत्कृष्ट प्रतिरक्षा गरेका थिए।
हिजोको खेलमा नेपाल आफ्ना ५ डेब्यू खेलाडीसहित मैदानमा उत्रिएको थियो। नेपालले रवी पासवान र सन्तोष तामाङ तथा डिफेन्डरद्वय सुरज विक र अजित भण्डारीलाई पहिलो पटक अन्तराष्ट्रिय मैदानमा उतार्यो । विमल राना वैकल्पिकका रुपमा मैदान प्रवेश गरेका थिए ।
नेपाल तथा कुवेत दुबैले गोल गर्ने मौकाहरू गुमाएका थिए। खेलको ६१ औं मिनेटमा कुवेतले पेनाल्टीको अवसर पाएपनि त्यसलाई आफ्नो पक्षमा पार्न सकेन।
लामो पास क्लियर गर्ने क्रममा एयर बलमा अजित भण्डारीले खुट्टा प्रयोग गरेपछि रेफ्रीले कुवेतलाई पेनाल्टी दिएका थिए । सो पेनाल्टीले पोस्ट बाहिरको दिशा समातेपछि नेपाल गोल खानबाट जोगियो ।
त्यस्तै खेलको ८४ औं मिनेटमा विमल रानाले गोल गर्ने मौका पाएपनि उनको प्रहारले पोस्टको दिशा लिन सकेको थिएन ।
यसअघि नेपालले कुवेतसँग सन् २००० मा एएफसी एसिया कपमा प्रतिस्पर्धा गरेको थियो । उक्त खेलमा नेपाल ५–० ले पराजित भएको थियो ।
नेपाली टोलीले आगामी मङ्गलबार दोस्रो खेल खेल्नेछ ।
