संघर्षपूर्ण जित निकाल्दै म्यानचेस्टर सिटी एफ ए कपको सेमिफाइनल प्रवेश गरेको छ ।
शनिबार राति भएको क्वाटरफाइनल खेलमा म्यानचेस्टर सिटीले तुलनात्मकरूपमा कमजोर स्वान्सी सिटीमाथि ३-२ को संघर्षपुर्ण जित निकालेको हो।
हिजोको खेलको स्वान्सीले म्यानचेस्टरलाई पहिलो हाफमा २-० ले पछि पारेको थियो। दोश्रो हाफमा म्यानचेस्टर सिटीले सो नतिजालाई बराबरी गर्दै खेलमा जित हासिल गर्यो।
दोश्रो हाफमा २ गोल फर्काएको म्यानचेस्टरका लागि १ गोल भने उपहारका रूपमा प्राप्त भयो र सो उपहारमा प्राप्त गोलले नै उसलाई सेमिफाइनल प्रवेश गराउने आधार बन्यो।
खेलको ७८ औँ मिनेटमा स्वान्सीका गोलरक्षक क्रिष्टोफर नोर्डफेल्ड्टले जोगाउने प्रयास गर्दा आफ्नै पोस्टमा गोल गर्न पुगेपछि म्यानचेस्टरले गोल उपहार पाएको हो ।
त्यसअघि खेलको २० औँ मिनेटमा प्राप्त पेनाल्टीमा स्वान्सीले सुरूवाती अग्रता लिएको थियो। सो गोल म्याट ग्राइम्सले गरेका हुन् । २९ औँ मिनेटमा बर्सान्त सेलिनाले गोल गर्दै पहिलो हाफमा स्वान्सीलाई २–० को अवस्थामा पुर्याएका थिए ।
दोस्रो हाफमा म्यानचेस्टर सिटी खेलमा फर्कियो । ६९ औँ मिनेटमा बर्नार्डो सिल्भाले गोल गर्दै २-० को अग्रतालाइ २-१ को अवस्थामा ल्याए।
त्यसपछि खेलको ७८ औं मिनेटमा उपहार गोल पाएको म्यानचेस्टरका लागि ८८ औँ मिनेटमा सर्जियो अग्युरोले निर्णायक गोल गरे र म्यानचेस्टर सिटी विजयी भयो।
त्यसैगरी हिजो नै भएको अर्को खेलमा क्रिष्टल प्यालेसलाई २–१ ले हराउँदै वाट्फोर्ड पनि एफए कपको सेमिफाइनलमा पुगेको छ ।