आयोजक लाली रुपन्देही ११ लाई पराजित गर्दै विदेशी टिम दाफिन्स एफ सी क्यामरुन २१ औं तिलोत्तमा गोल्डकपको फाइनलमा प्रवेश गरेको छ।
बुटवलको एन्फा टेक्निकल सेन्टरमा शुक्रबार भएको पहिलो सेमिफाइनल खेलमा आयोजक लाली रुपन्देहीलाई २–० ले हराउँदै दाफिन्स एफसी फाइनलमा प्रवेश गरेको हो।
प्रतिस्पर्धात्मक खेलमा खेल सुरू भएको २ मिनेटमै दाफिन्सले गोल गरेको थियो। दाफिन्सका लागि पेनाल्टीमार्फत् डिजर टिनाले गरेका थिए। त्यस्तै अर्को गोल दाफिन्सकै डिजर टिनाले दोस्रो हाफको ३९ औं मिनटमा गरे।
मनकामना केवलकारको उपाधि र बुढासुव्बा गोल्डकपको उपाधि उचालेको दाफिन्स क्वाटरफाइनलमा झापा ११ लाई ५–० ले हराउँदै सेमिफाइनलमा प्रवेश गरेको थियो।
प्रतियोगितामा विभागीय २ टिमसहित १० टिमको सहभागिता रहेको छ। २१ औं संस्करणमा तिलोत्तमा गोल्डकपको विजेताले ८ लाख ८० हजार रुपैयाँ नगदसहित कप पाउनेछ भने उपविजेताले ५ लाख ५० हजार रुपैयाँ पाउने छन्।
त्यस्तै प्रतियोगिताको उत्कृष्ट खेलाडीले मोटरसाइकल उपहार पाउनेछन् भने विधागत उत्कृष्ट खेलाडी तथा प्रशिक्षक तथा रेफ्रीले २५ र २५ हजार नगदबाट सम्मानित हुनेछन्।
प्रतियोगिता अन्तर्गत शनिबार अन्तिम सेमिफाइनल खेलमा विभागीय टिम नेपाल पुलिस क्लब र च्यासल युथ क्लब काठमाडौंका बीच हुने आयोजकले जनाएको छ।