९९ मिलियन पाउण्डमा यही सिजन रियल मड्रिडबाट युभेन्टस आएका क्रिष्टियानो रोनाल्डोका लागि तेस्रो क्लबबाट च्याम्पियन लिग जित्ने मौका कठिन बनेको छ।
अहिलेसम्म पाँचपटक च्याम्पियन्स लिगको उपाधि जितिसकेका रोनाल्डोले चार पटक रियल मड्रिड र एक पटक म्यानचेस्टर युनाइटेडबाट उपाधि जितेका छन्।
घरेलु लिगमा उत्कृष्ट प्रदर्शन गर्दै आएको युभेन्टस महादेशीय प्रतिस्पर्धामा भने गएरातिको नतिजासँगै कमजोर देखिएको छ।
च्याम्पियन्स लिग फुटबल अन्तर्गत अन्तिम १६ को पहिलो लेगमा इटालियन सिरी ए क्लब युभेन्टस स्पेनिस ला लिगा क्लब एथ्लेटिको मड्रिडसँग २-० ले पराजित भयो।
यो पराजयसँगै युभेन्टसबाट पनि युरोपियन उपाधि जित्न चाहने रोनाल्डोको यात्रा कठिन बनेको हो।
सन् १९९५–९६ यता युभेन्टसले च्याम्पियन्स लिगको उपाधि जित्न सकेको छैन। सन् २०१६/१७को सिजनको फाइनलमा रियल मड्रिडसँगै युभेन्टस ४-१ ले पराजित भएको थियो। उक्त खेलमा रोनाल्डोले २ गोल गर्दै प्लेयर अफ द म्याचसमेत भएका थिए।
अब घरेलु मैदानमा हुने दोस्रो लेगमा उत्कृष्ट पुनरागमन नगरी रोनाल्डोसँगै क्लबको सम्भावना देखिँदैन।
दोस्रो लेग आउँदो मार्च १२ मा युभेन्टसको घरेलु मैदानमा हुनेछ।
