इङ्लिस प्रिमियर लिग फुटबलमा आइतबार बिहान भएको ‘लन्डन डर्बी’ मा आर्सनलले चेल्सीलाई २-० गोलले हराएको छ।
यो जितसँगै पाँचौ स्थाना उक्लिएको आर्सनल तालिकाको माथिल्लो चार स्थानभित्र रहेर लिग टुंग्याउँने सम्भावना कायमै राखेको छ।
आर्सनलले गोलअन्तरका आधारमा म्यानचेस्टर युनाइटेडलाई पछि पार्दै तालिकाको चौथो स्थानमा रहेको चेल्सीसँगको अंक दूरी तीनमा झारेको छ।
आर्सनललाई जिताउन एलेक्जेन्डर लाकाजेट्टी र लाउरेन्ट कोसिएल्नीले गोल गरे।
आर्सनलले दुबै गोल खेलको पहिलो हाफमै गरेको थियो।
अत्यान्त रोमाञ्चक खेलको चौथो मिनेटमै एलेक्जेन्डर लाकाजेट्टीले गोल गर्दै आर्सनललाई सुरूवाती अग्रता दिलाएका थिए। खेलको ३९औं मिनेटमा कप्तान लाउरेन्ट कोसिएल्नीले गोल गर्दै आर्सनलको अग्रता पहिलो हाफमै दोब्बर बनाए।
दोस्रो हाफमा सुधारिएको खेल खेलेको चेल्सीले गोल गर्ने केही राम्रा मौका खेर फाल्यो।
पछिल्लो समय खराब लयमा रहेका यी दुबै टोलीले गतिलो प्रदर्शन गर्न सकिरहेका छैनन्। आफूले खेलेका पछिल्ला आठमध्ये चार खेलमा आर्सनल पराजित भएको छ। यस्तै चेल्सी पनि आफूले खेलेका पछिल्ला सातमध्ये चार खेलमा मात्र जित हात पार्न सकेको छ।
यो नतिजासँगै लिगमा २३ खेल खेलेको लिभरपुल ६० अंकसहित पहिलो स्थानमा छ। एक खेल कम खेलेको म्यान्चेष्टर सिटी ५३ अंकसहित दोस्रो तथा २२ खेलबाटै ४८ अंक हात पारेको टोट्टनह्याम तेस्रो स्थानमा छन्।
चौथो स्थानमा रहेको चेल्सीले यो पराजयसँगै तेस्रो स्थानमा उक्लने मौका गुमायो। २३ खेलबाट ४७ अंक भएको चेल्सीले आज जितेको भए तेस्रो स्थानमा पुग्ने थियो। यता पाँचौं स्थानमै रहेको आर्सनलको समान खेलबाट ४४ अंक भए पनि गोलअन्तरका आधारमा तालिकाको छैठौं स्थानमा झरेको हो।