पेरिस सेन्ट जर्मन (पीएसजी) ले तुलनात्मक रुपमा कमजोर प्रतिद्वन्द्वी गुइनग्याम्पको पोष्टमा गोल वर्षा गरेको छ। फ्रेन्च लिग फुटबल अन्तर्गत शनिबार राति ‘लिग लिडर’ पीएसजीले घरेलु मैदानमा गुइनग्याम्पलाई ९-० गोल अन्तरले हरायो।
पीएसजीका लागि केलियन एमबाप्पे र एडिन्सन काभानीले ह्याट्रिक गर्दा नेमारले दुई गोल थपेका थिए। अर्को एक गोल थोमस मुनियरले गरेका थिए।
फ्रेन्च लिगमा पीएसजीको यो सबैभन्दा ठूलो अन्तरको जित हो। गत वर्ष पीएसजीले डिजनलाई ८—० गोलले हराएको थियो।
फ्रेन्च कप फुटबलमा १० दिनअघि गुइनग्याम्पसँग अप्रत्यासित रूपमा २-१ गोलले हारेको पिएसजीले गएराति गोलको वर्षै गर्यो। उक्त खेलमा विजयी हुँदै गुइनग्याम्प फ्रेन्च कपको सेमिफाइनलमा पुगेको थियो।
शनिबार रातिको एकपक्षीय खेलको ११ औं मिनेटमा नेमारले गोल गर्दै पिएसजीलाई सुरूवाती अग्रता दिलाए।
खेलको ३७औं मिनेटमा एम्बाप्पेले गोल गर्दै टोलीको अग्रता दोब्बर पारे। पहिलो हाफको इन्जुरी समयमा एमबाप्पेले व्यक्तिगत दोस्रो गोल गर्दै पहिलो हाफै ३-० को अग्रता बनाए।
दोस्रो हाफमा थप आक्रमक बनेको पिएसजीले थप ६ गोल गर्यो।
खेलको ५९औं मिनेटमा काभानीले गोल गर्दै टोलीको अग्रता ४-० पुर्याए। त्यसको ७ मिनेटपछि ६६औं मिनेटमा काभानीले नै दोस्रो गोल गर्दै अग्रता ५-० मा पुर्याए।
त्यसको २ नेटपछि नेमारले ब्यक्तिगत रुपमा दोस्रो गोल गरे भने ७५औं मिनेटमा काभानीले ह्याट्रिक पूरा गरे।
८०औं मिनेटमा अर्को आकर्षक गोल गर्दै एम्बाप्पेले पनि आफ्नो ह्याट्रिक पूरा गरे। ८३औं मिनेटमा थोमसले टोलीका लागि नवौं गोल गरेका थिए ।
यो जितसँगै अपराजित पिएसजी १९ खेलबाट ५३ अंकसहित तालिकाको पहिलो स्थानमा कायमै छ।
दुई खेल बढी खेलेको लोस्क २१ खेलबाट ४० अंक बटुल्दै दोस्रो स्थानमा छ। यस्तै २० खेलबाट ३६ अंक बटुलेको सेन्ट एटिन तेस्रो स्थानमा छन्।
गुइनग्याम्प भने २१ खेलबाट १४ अंक जोड्दै तालिकाको पुछारमा छ।
