सेभिल्लालाई हराउँदै रियल मड्रिड स्पेनिस ला लिगा फुटबल तालिकाको तेस्रो स्थानमा उक्लिएको छ।
शनिबार राति घरेलु मैदानमा भएको खेलमा सेभिल्लामाथि २-० गोल अन्तरले हराउँदै रियल अंक तालिकाको तेस्रो स्थानमा उक्लिएको हो।
रियललाई जिताउन कासेमिरो र लुका मोड्रिचले एक/एक गोल गरेका थिए।
पहिलो हाफसम्म गोलरहित बराबरी खेलेको रियलले दुबै गोल दोस्रो हाफमा गरेको थियो।
खेलको ७८औं मिनेटमा कासेमिरोले गोल गर्दै घरेलु टोलीलाई सुरूवाती अग्रता दिलाएका थिए।
इन्जुरी समयमा मोड्रिचले टोलीका लागि दोस्रो गोल गर्दै सहज जित दिलाए।
यो जितसँगै ला लिगामा २० खेलबाट ३६ अंक बटुलेको रियल तेस्रो स्थानमा उक्लिएको छ।
एक खेल कम खेलेको बार्सिलोना १९ खेलबाट ४३ अंकसहित शीर्ष स्थानमा रहँदा दोस्रो स्थानको एट्लेटिको मड्रिडले गएराति एसडी हुएस्कालाई हराउँदै २० खेलबाट ४१ अंक बनाएको छ।
चौथो स्थानको सेभिल्ला भने रियलसँगको हारले २० खेलबाट ३३ अंकसहित चौथो स्थानमा कायमै रहेको छ।
सन् १९९३ पछि रियल र सेभिल्लाबीच खेलिएको कुनै पनि खेल बराबरीमा सकिएको छैन।