कप्तान लियोनेल मेसी र उस्मान डेम्वेले गोल गरेपछि लेभान्टेबिरुद्ध उत्कृष्ट पुनरागमनसहितको जित हासिल गरी बार्सिलोना स्पेनिस कप कोपा डेल रे को क्वाटरफाइनलमा प्रवेश गरेको छ ।
पहिलो लेगमा २-१ गोल अन्तरले पराजित भएको बार्सिलोनाले दोस्रो लेगमा घरेलु मैदान नाउ क्याम्पमा ३-० को जित निकाल्दै समग्रमा ४-२ गोलको जितसँगै प्रतियोगिताको अन्तिम आठमा पुगेको हो।
गए राति घरेलु टोलीलाई जिताउन फ्रेन्च स्ट्राइकर डेम्बेलेले र कप्तान मेसीले गोल गरे। खेलको ३०औं मिनेटमा डेब्बेलेले गोल गर्दै खेलमा सुरूवाती अग्रता बनाए। त्यसको दुई मिनेटै दोस्रो गोल गरेको डेम्बेलेले बार्सिलोनाले पहिलो हाफमै २-० को अग्रता बनाए।
दोस्रो हाफमा पनि दबाब राखेको बार्सिलोनाले खेलको ५४औं मिनेटमा अग्रता तेब्बर पार्यो। गत सातामात्रै ला लिगामा बार्सिलोनाका लागि चार सयौं गोल पूरा गरेका कप्तान मेसीले टिमका लागि तेस्रो गोल गरेका हुन्।
पहिलो लेगमा २-१ को अग्रतासहित नाउक्याम्प पुगेको लेभान्टे त्यसपछि खेलमा फर्कन नसक्दा प्रिक्वाटरफाइनल बाटै घर फर्कियो।
यसैबीच, साविक विजेता बार्सिलोना विवादमा तानिएको छ। पहिलो लेगमा अयोग्य खेलाडी खेलाएको भन्दै विवाद भएको हो। जसले गर्दा बार्सिलोना प्रतियोगितामा अयोग्य हुने सम्भावनासमेत रहेको छ।
लेभान्टेले बी टिमबाट खेल्दा दोहोरो पहेलो कार्ड पाएका १९ वर्षीय डिफेण्डर जुहान बर्नाटेरिजलाई मैदानमा उतारेर नियम मिचेको भन्दै बार्सिलोनाबिरुद्ध स्पेनिस फुटबल संघमा उजुरी हाल्ने भनेपछि विवादमा तानिएको हो।
यता बार्सिलोनाका अधिकारीहरुले भने आफूहरुले कुनै गलत काम नगरेको दाबी गरेको छन्। गत नोभेम्बरमा नियम परिवर्तन भएकाले कोपामा खेलाडी निलम्बन नहुने उसको भनाइ छ। यसअघि सन् २०१५ मा प्रतिबन्धित खेलाडी खेलाएको आरोप प्रमाणित भएपछि रियल मड्रिडलाई अयोग्य घोषणा गरिएको थियो।