म्यानचेस्टर सिटीले लिग कप फुटबलअन्तर्गत सेमिफाइनलको पहिलो लेगमा बर्टन आल्बियनलाई ९-० को फराकिलो अन्तरले पराजित गरेको छ।
यो फराकिलो जितसँगै सिटी प्रतियोगिताको फाइनलमा पुग्ने लगभग पक्का भएको छ ।
घरेलु मैदान इथिहाड रंगशालामा सिटीको फराकिलो जितमा गाब्रिएल जेसस एक्लैले ४ गोल गर्दा केभि डिब्रुयेन, ओलेक्जान्दर जिन्चेन्को, फिल फोडेन, केल वाल्कर र रियाद मेहेरेजले एक एक गोल गरे।
तेस्रो डिभिजनको इंग्लिस टोलीले फराकिलो हार ब्यहोर्ने क्रममा पहिलो हाफमा चार र दोस्रो हाफमा पाँच गोल खाएको थियो।
केभिन डे ब्रुएनले खेलको पाँचौ मिनेटमा गोल गर्दै सुरूवाती अग्रता दिलाएका थिए। ३० औं मिनेटमा ग्याब्रिएल जेससले गोल गर्दै अग्रता दोब्बर पारे।
त्यसको चार मिनेटपछि जेससले नै अग्रता तेब्बर पारे। पहिलो हाफको ३७ औं मिनेटमा ओलेक्जान्डर जिन्चेन्कोले चौथो गोल थप्दै पहिलो हाफमा ४-०को अग्रता दिलाए।
दोस्रो हाफको ५७ औं मिनेटमा जेससले गोल गर्दै ह्याट्रिक पूरा गरे। ६२ औं मिनेटमा फिल फोडेनले गोल गर्दा टिमको अग्रता आधा दर्जन थियो। त्यसको तीन मिनेटमा जेससले आफ्नो चौथो गोल थप्दै टोलीलाई ७-० को अग्रता दिलाए।
सिटीमा यतिमा रोकिएन खेलको ७९ औं मिनेटमा काइल वाल्करले गोल गर्दै ८-० को स्थितिमा पुर्याए। खेलको ८३औं मिनेटमा रियाद माहरेजले गोल गर्दै ९-० को जित पक्का गरे।
पछिल्लो ६ सिजनमा ४ पटक प्रतियोगिताको फाइनल यात्रा तय गरेको सिटी प्रतियोगिताको साविक विजेता समेत हो। सिटीले अब चेल्सी र टोटेनहमबिचको खेलको विजेतासँग खेल्नेछ। पहिलो लेगमा टोटेनहम १-० ले अगाडि छ।
३१ वर्षपछि सिटीले यति फराकिलो जित निकालेको हो। सन् १९८७ को नोभेम्बरमा उसले दोस्रो डिभिजनको लिगमा हडर्सफिल्ट टाउनमाथि १०-० गोलको जित निकालेको थियो।
साथै सिटीले चार दिनमा विपक्षीको पोष्टमा १६ गोल गरेको छ। सोमबार मात्रै उसले एफए कप तेस्रो चरणमा रोथरह्याम युनाइटेडलाई ७-० गोलले हराएको थियो ।
औपचारिकताका लागि मात्रै हुने दोस्रो लेग बुर्टोनको घरेलु मैदानमा पिरेल्ली रंगशालामा जनवरी २३ मा हुनेछ। लिग कपको फाइनल फेब्रुअरी २४ मा वेम्वली रंगशालामा हुनेछ।
