साविक विजेता पेरिस सेन्ट जर्मेन फ्रेन्च लिग कप फुटबलको क्वाटरफाइनलमा अप्रत्यासित पराजय ब्यहोर्दै प्रतियोगिताबाट बाहिरिएको छ।
फ्रान्सेली लिग वनमा अपराजित रहँदै शीर्ष स्थान कायम गरेको पेरिस सेन्ट जर्मेन (पीएसजी) फ्रेन्च लिग कपमा लिगको पुछारमा रहेको ग्वेनगाम्पसँग बुधबार राति घरेलु मैदानमा २-१ ले पराजित हुँदै प्रतियोगिताबाट बाहिरिएको हो।
लिग वानमा रेलिगेसनबाट बच्न संघर्षरत गुइनग्याम्पले पीएसजीलाई अप्रत्यासित रूपमा हराउँदा दुवै गोल पेनाल्टीमा गरेको हो। पिएसजीका लागि नेइमारले गोल गरे।
पहिलो हाफसम्म गोलरहित बराबरी खेलेको पिएसजीले खेलको ६३ औं मिनेटमा नेयमारको गोलबाट सुरूवाती अग्रता लिएको थियो।
त्यसअघि खेलको ६१ औं मिनेटमा मार्कस थुरामले पेनाल्टीमा गोल गर्न नसक्दा ग्वेनगाम्पले सुरूवाती अग्रता लिने मौका गुमाएको थियो।
तर ग्वेनगाम्पले अन्तिम १० मिनेटमा दुई गोल गर्दै पिएसजीलाई स्तब्ध पार्यो। दुबै गोल पेनाल्टीबाट सम्भव भएको थियो।
खेलको ८१ औं मिनेटमा यानी एनुबकोतोले पहिलो पेनाल्टी गोल गर्दा इन्ज्युरी समयको पहिलो मिनेटमा अर्को मार्कस थुराम दोस्रो पेनाल्टी गोल गरे।
यस हारसँगै पीएसजीको घरेलु कप प्रतियोगितामा ४९ खेलको विजयी यात्रामा पूर्णविराम लागेको छ। सन् २०१४ मा मोन्टपेलरसँग पराजित भएयता पीएसजीले लगातार जित हासिल गर्दै आएको थियो।
