कप्तान लिओनल मेसीले ह्याट्रिक गरेपछि स्पेनिस ला लिगामा बार्सिलोनाले लेभान्टेमाथि ५–० को फराकिलो जित निकालेको छ।
बार्सिलोनाको जितमा थप दुई गोल लुइस सुआरेज र जेरार्ड पिकेले गरे।
भ्यालेन्सियामा भएको खेलको ३५ मिनेटमा सुआरेजले गोल गर्दै बार्सिलोनालाई सुरूवाती अग्रता दिलाएका थिए।
चोटबाट कमब्याक गरेका उनले कप्तान मेसीको पासमा गोल गरेका थिए।
त्यसपछि खेलको ४३ औं मिनेटमा कप्तान मेसी आफैंले गोल गर्दै अग्रता दोब्बर पारे।
पहिलो हाफमा २ गोलले अगाडि रहेको बार्सिलोनाले दोस्रो हाफमा थप आक्रमक खेल्दै तीन गोल थप्यो।
दोस्रो हाफको सुरूमै मेसीले व्यक्तिगत दोस्रो गोल गर्दा टिमको अग्रता तेब्बर पुग्यो।
यस्तै खेलको ६० औं मिनेटमा अर्टुरो भिडालले दिएको पासमा गोल गर्दै मेसीले ह्याट्रिक पुरा गरे।
एक पक्षीय खेलमा बार्सिलोनाले बिपक्षीलाई गोल गर्ने कुनै मौका दिएन। ला लिगामा ३१ औं ह्याट्रिक गरेका मेसीले थप गोल गर्ने मौका गुमाए तर, खेलको ८८ औं मिनेटमा जेरार्ड पिकेले गोल गर्दा बार्सिलोना ५–० ले विजयी भयो।
यो फराकिलो जितपछि बार्सिलोना शीर्ष स्थानमा कायमै छ। साथै दोस्रो स्थानमा रहेको सेभियासँगको अंक दुरी तीनमा पुर्याएको छ। बार्सिलोनाले १६ खेलबाट ३४ अंक जोड्दा सेभिल्लाको समान खेलबाट ३१ अंक छ। तेस्रो स्थानमा रहेको एथ्लेटिको मड्रिडको पनि समान ३१ अंक छ। यो सँगै २९ अंक जोडेको रियल मड्रिड चौथो स्थानमा झरेको छ।