रियल मड्रिड स्पेनिस ला लिगा फुटबलको तेस्रो स्थानमा उक्लिएको छ। लिग अन्तर्गत शनिबार राति रायो भालेकानोमाथि संघर्षपूर्ण जित निकाल्दै स्पेनिस क्लब रियल म्याड्रिड लिगको तेस्रो स्थानमा उक्लिएको हो।
रियललाई जिताउन करिम बेन्जेमाले निर्णायक गोल गरे।
घरेलु मैदान सान्टियोगो बर्नबेउमामा भएको खेलमा बेन्जेमाले खेलको १३औं मिनेटमा निर्णायक गोल गरेका थिए।
त्यसपछि पाएका केही राम्रा अवसरहरू दुबै टोलीले खेर फालेका थिए।
रक्षात्कम रणनीति लिएको रायो भालेकानोमाथि रियलका आधा दर्जन प्रहार बिफल भएका थिए। भालेकानोले पनि केही राम्रा मुभ बनाए पनि गोल गर्न नसक्दा पराजय ब्यहोर्नुपर्यो।
प्रतिस्पर्धात्मक बनेको खेलमा त्यसपछि दुवै टोलीले गोल गर्न नसक्दा रियलले १–० को जित निकाल्न सफल भयो।
यो सँगै रियलले शीर्षस्थानको बार्सिलोना र एट्लेटिको मड्रिडसँगको अंक दुरी २ मा झारेको छ।
एक खेल कम खेल्दै लिगको शीर्ष स्थानमा रहेको बार्सिलोना र एट्लेटिकोको समान ३१ अंक भए पनि गोल अन्तरमा बार्सिलोना अगाडि छ।
१६ खेलबाट ९ जितसहित २९ अंक जोडेको रियल तेस्रो स्थानमा रहँदा एक खेल कम खेलेको सेभिल्ला २८ अंकसहित चौथो स्थानमा छन्।