जारी प्रिमियर लिगको शीर्ष स्थान कायम राख्ने क्रममा इंग्लिस क्लब म्यानचेस्टर सिटीले एभर्टनलाई ३–१ गोल अन्तरले हराएको छ। लिभरपुलसँग अंकतालिकामा पछि परेको म्यानचेस्टर सिटीले एभर्टनलाई हराउँदै शीर्ष स्थानमा आफूलाई पुनरागमन गराएको हो।
जितमा सिटीलाई ब्राजिलियन फर्वाड गाब्रिएल जिससले २ गोल दिलाए भने रहिम स्टर्लिङले १ गोल गरे।
जिससले २२ र ५० मिनेटमा गोल गरेका थिए।
पहिलो हाफमा १–० खेलिरहेको सिटीले दोस्रो हाफ सुरू हुनेवित्तिकै गोल गरेको थियो।
दोस्रो हाफमा एभर्टन खेलमा फर्किन खोज्यो। एभर्टनका कालर्भट लेविनले ६५ मिनेटमा गोल फर्काए।
एभर्टनले गोल फर्काएपछि सिटीका फर्वाड परिवर्तन भए। ६६ मिनेटमा फर्वाड साने बाहिरिए, रहिम स्टर्लिङले मैदान छिरे। रहिमले मैदान छिरेको तीन मिनेटमै अर्को गोल गरेपछि सिटीले सहज जित निकाल्यो।
