होफेनहाइमलाई हराउँदै म्यानचेस्टर सिटी युईएफए च्याम्पियन्स लिग फुटबलमा समूह विजेता बन्दै नकआउट चरणमा प्रवेश गरेको छ।
बुधबार राति भएको समूह चरणको अन्तिम खेलमा इंग्लिश क्लब सिटीले जर्मन क्लब होफेनहाइमलाई २-१ ले हराउँदै समूह 'एफ' को विजेताको रूपमा अन्तिम १६ मा प्रवेश गरेको हो।
घरेलु मैदानमा सिटीलाई जिताउन दुबै गोल लोरी सानेले गरे। होफेनहाइमका आन्द्रेज कर्मारीचले एक गोल फर्काएका थिए।
खेलको १६ औं मिनेटमा पेनाल्टीमार्फत कर्मारीचले गोल गर्दै पाहुना टोलीलाई सुरूवाती अग्रता दिलाएका थिए ।
तर, खेलको ४५ औं मिनेटमा सिटीका सानेले गोल गर्दै पहिलो हाफमै खेल बराबरीमा ल्याए।
दोस्रो हाफमा सिटीले थप एक गोल गर्यो। खेलको ६१ औं मिनेटमा सानेले व्यक्तिगत दोस्रो गोल गर्दा सिटीले खेलमा अग्रता लियो। त्यसपछि कुनै गोल भएन र सिटीले खेल २-१ ले आफ्नो पक्षमा पार्यो।
यो जितसँगै सिटीले ६ खेलबाट १३ अंक जोड्दै समूह विजेता बन्यो उता पराजित होफेनहाईम ३ अंक जोड्दै समूहको पुछारमा रह्यो।
यही समूहबाट बुधबारै भएको अर्को खेलमा शख्तर डोनेक्स्टसँग बराबरी खेलेको लियोन समूह उपविजेताका रूपमा नकआउट चरणमा स्थान बनायो।