इटालियन च्याम्पियन युभेन्टसलाई कमजोर मानिएको स्विस क्लब योङ ब्वाईजसँग पराजित भएको छ।
युईएफए च्याम्पियन्स लिग फुटबल अन्तर्गत समूह चरणको अन्तिम खेलमा बुधबार राति युभेन्ट्सलाई योङ ब्वाईजले २-१ ले हराएको हो।
योङको घरेलु मैदानमा भएको खेलमा ३० औं मिनेटमा गुईलाउमी होअराउले गोल गर्दै सुरूवाती अग्रता बनाएको थियो।
पहिलो हाफ अघि युभेन्टसका केही राम्रा प्रहार विपक्षी गोल किपरले बिफल बनाएपछि पहिलो हाफमा घरेलु टोलीले १-० को अग्रता लिएको थियो।
दोस्रो हाफमा थप उत्साहित घरेलु टोलीले ६८ औं मिनेटमा गोल गर्दै अग्रता दोब्बर पारे। गुईलाउमी होअराउलेनै घरेलु टोलीका लागि दोस्रो गोल गरेका हुन्।
खेलको ८० औं मिनेटमा पाउल डिबालाले गोल गर्दै युभेन्ट्सलाई खेलमा फर्काउने कोशिश गरे पनि हारबाट जोगाउन सकेनन्।
खेलमा बल पोजिसनमा पकड जमाए पनि युभेन्ट्सले थप गोल गर्न नसक्दा २-१ ले हार व्यहोर्नु पर्यो।
जितसँगै योङले च्याम्पियन्स लिग फुटबलमा पहिलो जित दर्ता गरेको छ। तर, योङ नकआउट चरणमा भने पुग्न सकेनन् ।
समूह चरणको अन्तिम खेलमा पराजित भएपनि युभेन्ट्स समूह विजेता बन्दै नकआउट चरणमा पुगेको छ । युभेन्ट्सले ६ खेलबाट १२ अंक जोड्यो । योङले ४ अंक जोड्न सक्यो ।
यही समूहको अर्को खेलमा इंग्लिस क्लब म्यानचेस्टर युनाइटेड स्पेनिस क्लब भ्यालेन्सियासँग पराजि भयो। यद्यपी उ समूहको उपविजेताका रूपमा दोस्रो चरणमा प्रवेश गरेको छ।