जावलाखेललाई हराउँदै थ्री स्टार क्लबले राजधानीमा जारी ए डिभिजन लिगमा शीर्ष स्थानको मनाङ मर्स्याङ्दी क्लबसँग अंक बराबर गरेको छ।
सातदोबाटोस्थित एन्फा मैदानमा आइतबार भएको दोस्रो खेलमा थ्रीस्टारले जावलाखेललाई २-० गोल अन्तरले हराउँदै लिगको शीर्ष स्थानमा रहेको मनाङ र संकटासँग अंक बराबरी गरेको हो।
सुरूवातदेखि नै आक्रामक रुपमा उत्रिएको थ्रीस्टारलाई जावलाखेलले गोलरहित बराबरीमा रोकेको थियो।
दोस्रो हाफमा थप आक्रमक खेल खेलेको थ्रीस्टारले खेलको ५२ औं मिनेटमा पेनाल्टीमार्फत गोल गर्दै रञ्जित धिमालले टिमलाई अग्रता दिलाए।
खेलको ६९ औं मिनेटमा रन्जन विष्टले एक्लै बल अघि बढाएको अवस्थामा डि बक्स नजिकै फल हानेपछि रेफ्रीले कुलदिप कार्कीलाई सिधै रातो कार्ड दिएका थिए। त्यसपछि बाकी समय १० खेलाडीमा सिमित भएको जावलाखेलले आक्रमण बुन्न सकेन।
त्यसपछि पाएको फ्रि किकमा गोल गर्दै थ्रिस्टारले अग्रता दोब्बर पार्यो। रञ्जितले नै थ्रिस्टारका लागि दोस्रो गोल गरेका हुन्।
त्यसपछि दुबै टोलीबाट गोल भएन र खेल थ्री स्टारले २-० ले जित्यो।
जितसँगै थ्रिस्टारले सात खेलबाट १८ अंक बनाउँदै शीर्ष स्थानमा रहेको मनाङ र संकटासँग अंक बराबरी गरेको छ। तर हेड टु हेडका आधारमा थ्रिस्टार दोस्रो स्थानमा छ।
सबै तस्बिरहरूः निशा भण्डारी
