नेपाल एपीएफ क्लबले राजधानीमा जारी सहिद स्मारक ए डिभिजन लिगमा तेस्रो जित निकालेको छ।
लिग अन्तर्गत आइतबार सरस्वती युवा क्लबलाई ३-० ले हराउँदै एपिएफले तेस्रो जित निकालेको हो।
खेलको १८औं मिनेटमा श्याम नेपालीको कर्नरमा रुपबहादुर लामाले गोल गर्दै एपीएफलाई सुरूवाती अग्रता दिलाएका थिए।
यस्तै ४३ औं मिनेटमा युवराज खड्काले गोल गर्दै एपिएफको अग्रता दोब्बर पारे।
पहिलो हाफमा २-० ले पछि परेको सरस्वतीले दोस्रो हाफमा केही सुधारिएको खेल खेल्यो।
सरस्वतीले दोस्रो हाफमा केही राम्रा गोल गर्ने अवसर खेर फाल्दा अग्रता घटाउन सकेन।
त्यस्तै बारम्बार आधा दर्जन प्रहार विफल भएपछि सरस्वतीले एपिएफविरूद्ध गोल गर्न सकेन। खेलको ८७ औं मिनेटमा श्याम नेपालीको पासमा रुपबहादुरले व्यक्तिगत दोस्रो गोल गर्दा एपिएफको अग्रता ३-० मा पुग्यो।
त्यसपछि खेलमा फर्कने प्रयास गरेको सरस्वतीले एपिएफविरूद्ध गोल गर्न असफल रह्यो।
यो जितसँगै एपीएफको ७ खेलमा ३ जित र १ बराबरीसँगै १० अंक बनाएर लिगको १० औं स्थानमा यथावत छ।
पराजित सरस्वतीले सातौ खेलबाट २ जितसहित ६ अंक जोडेर तालिकाको नवौ स्थानमा छ।
