मारियो मान्जुकिचको निर्णायक गोलमा युभेन्ट्सले इटालियन सिरी ए लिगमा इन्टर मिलानलाई हराउँदै आफ्नो अपराजित यात्रालाई कायमै राखेको छ।
शुक्रबार राति घरेलु मैदानमा भएको खेलमा इन्टर मिलानलाई १-० को झिनो अन्तरले हराउँदै युभेन्ट्सले अपराजित यात्रा कायम राखेको हो ।
खेलको पहिलो हाफमा रोबर्टो जिलार्डीनोको प्रहार पोस्टमा लागेर फर्कंदा इन्टर अग्रता लिनबाट चुकेको थियो।
पहिलो हाफ गोलरहित बराबरीमा सकिएको खेलको दोस्रो हाफमा युभेन्टसले गोल गर्यो। खेलको ६६ औं मिनेटमा जोआओ क्यान्सेलोको क्रसमा हेडरमार्फत गोल गर्दै मान्जुकिचले युभेन्ट्सलाई अग्रता दिलाए।
अत्यान्त प्रतिश्पर्धात्मक खेलमा त्यसपछि दुबै तर्फबाट गोल नहुँदा उक्त गोल नै निर्णायक भएको थियो।
इन्टरले खेलमा अग्रता कायम गर्ने मौका पाए पनि सदुपयोग गर्न नसक्दा युभेट्सको अपराजित यात्रा कायम रहयो ।
योसँगै युभेन्ट्सले शीर्ष स्थानमा ११ अंकको अग्रता कायम गरेको छ।
युभेको जितसँगै अपराजित सुरूवातको कीर्तिमान पनि बराबरी भएको छ।
१५ खेलमा १४ जित र १ बराबरीसँगै युभेले ४३ अंक जोडेको छ। युरोपको शीर्ष ५ लिगमा यो नै उत्कृष्ट सुरूवात हो। यसै सिजनमा पेरिस सेन्ट जर्मेन (पीएसजी) ले १५ खेलमा ४३ अंक जोड्दै कीर्तिमान बनाएको थियो।
यो पराजयले इन्टरलाई भने तेस्रो स्थानमा नै कायम राखेको छ। समान खेलबाट २९ अंक बटुलेको इन्टर अंक तालिकामा युभेन्ट्सभन्दा १४ अंकले पछाडि छ। यस्तै दोस्तो स्थानमा रहेको नेपोलीले एक खेल कम खेल्दै ३२ अंक बनाएको छ। नेपोलीले शनिबार फ्रोसिनोनेको सामना गर्दैछ।
पछिल्लो सात सिजन लिग उपाधि जितेको युभेन्ट्सले यस सिजन लिगको कुनै खेलमा पराजित भएको छैन। यस्तै युभेले घरेलु मैदानमा विगत ७ महिनादेखि अपराजित छ।