सहिद स्मारक ए डिभिजन लिग अन्तर्गत उपाधिको दाबेदार टिम थ्रिस्टारले पाँचौ जित निकालेको छ।
बुधबार भएको खेलमा थ्रीस्टारले सरस्वती क्लवलाई दुई एक गोलले हराउँदै दोस्रो स्थानमा उक्लिएको छ।
हलचोकस्थित सशस्त्र प्रहरीको मैदानमा भएको खेलमा थ्रिस्टारले सरस्वतीको एक गोलको अग्रता उल्ट्याउँदै जित हात पारेको हो।
खेलको तेस्रो मिनेटमा नै सरस्वतीले पेनाल्टीबाट गोल गर्दै खेलमा सुरूवाती अग्रता लियो।
सरस्वतीका लागि विदेशी खेलाडी भिक्टर अमोबीले गोल गर्दै खेलमा सुरूवाती अग्रता दिलाए।
खेलको सुरुवातमा नै एक गोलले पछि परेको थ्रीस्टारले १३ औं मिनेटमा गोल फर्काउने सुनौलो मौका पाएको थियो। तर सफल भएन। त्यसको दुई मिनेट पछि थ्रीस्टारले पेनाल्टीबाटै गोल गर्दै खेल बराबरीमा ल्यायो।
थ्री स्टारका लागि रञ्जित धिमालले गोल गर्दै खेल एक एकको बराबरीमा पुर्याए।
खेलको २४ औं मिनेटमा थ्रिस्टारले गोल गर्ने अर्को मौका खेर फाल्यो।
खेलको ३६ औं मिनेटमा थ्रिस्टारका लागि निराजन खड्काले गोल गर्दै खेलमा अग्रता दिलाए।
पहिलो हाफमा एक गोलले अगाडि रहेको थ्रिस्टारले दोस्रो हाफमा पनि करिब आधा दर्जन गोलका राम्रा मौका पाएका थिए। तर सरस्वतीको उत्कृष्ट डिफेन्स र गोल किपिङले थ्री स्टारले अग्रता बढाउन सकेन।
खेलको अन्त्यतिर सरस्वतीले राम्रो गोलको अवसर पाएको थियो। तर सफल हुन सकेन। त्यसपछि खेलमा कुनै पनि गोल भएन र थ्री स्टारले २-१ ले खेल जित्यो।
यो जितसँगै थ्रीस्टारले ६ खेलबाट ५ जितसहित १५ अंक बनाउँदै अंक तालिकाको दोस्रो स्थानमा उक्लिएको छ।
त्यस्तै बुधबार नै भएको अर्को खेलमा च्यासलले हिमालयन शेर्पालाई २-१ ले नै हरायो।
निकै प्रतिस्पर्धात्मक बनेको खेलमा च्यासलले हिमालयनको एक गोलको अग्रतालाई पन्छ्याउँदै जित हात पार्यो।
खेलको १५ औं मिनेटमा शेर्पाका त्रिदेभ गुरूङले गोल गर्दै टिमलाई सुरूवाती अग्रता दिलाएका थिए। त्यसपछि ३० औं मिनेटमा च्यासलका हेमन्त मगरको प्रहार क्रसबारमा लागेर फर्किएको थियो।
पहिलो हाफमा एक गोलले पछि परेको च्यासलले दोस्रो हाफमा दुई गोल गर्दै जित हात पार्यो।
खेलको ५६ औं मिनेटमा सन्तोष साउखलले गोल गर्दै खेल बराबरीमा पुर्याए। त्यसपछि ७३ औं मिनेटमा सब्सिच्युट खेलाडी सुनिल खड्काले च्यासलका लागि गोल गर्दै खेल दुई एकको अवस्थामा पुर्याउँदै सातौं स्थानमा उक्लिएको छ। उसले ६ खेलबाट ७ अंक बनाएको हो।
त्यस्तै प्रतियोगीता अन्तर्गत बुधबार भएको अर्को खेलमा मनाङ मर्याङ्दी क्लबले लगातार छैठौं जित निकाल्दै शीर्ष स्थानमा कायमै रहेको छ।
मनाङले जाउलाखेललाई एक शून्यको संघर्षपूर्ण जित निकाल्दै अपराजित यात्रा कायमै राखेको हो।
सातदोबाटोस्थित एन्फा कम्प्लेक्समा मनाङलाई जित दिलाउन अन्जन बिष्टले निर्णायक गोल गरे । खेलको ६२ औं मिनेटमा मनाङका अडेलाजालाई जावलाखेलका खेलाडीले लडाएपछी पाएको पेनाल्टीमा अन्जन बिष्टले गोल गरेका थिए ।
जितसंगै मनाङको ६ खेलबाट १८ अंक जोडेको छ । मनाङ लिगमा शतप्रतिशत जित निकाल्ने एक्लो टोली हो । पराजित जावलाखेल ४ अंक जोडेर ११ औं स्थानमा छ ।
जारी लिगमा अपराजित रहेको मनाङ ६ खेलबाट १८ अंक बनाउँदै लिगको शिर्ष स्थानमा कायमै रहेको हो।