जेम्स फरेस्टले ह्याट्रिक गरे गरेपछि स्कटल्यान्डले इजरायलमाथि रोमाञ्चक जित निकालेको छ।
ह्याम्पडेन पार्क ग्लास्गोमा मंगलबार राति भएको युइएफए नेसन्स लिग फुटबलमा स्कटल्यान्डले इजरायलमाथि ३–२ को रोमाञ्चक जित निकालेको हो।
इजरायलका लागि वेराम कायल र इरान जाहभीले गोल गरे पनि हार टार्न सकेनन्।
खेलको नवौ मिनेटमा वेरामको गोलबाट इजरायलले खेलमा अग्रता बनाएको थियो । तर खेलको ३४औं मिनेटमा जेम्स फरेस्टले गोल गर्दै खेललाई १–१ गोलको बराबरीमा ल्याएका थिए।
जेम्सले ४३ औं मिनेटमा व्यक्तिगत दोस्रो गोल गरेपछि स्कटल्यान्ड पहिलो हाफमा २–१ ले अगाडि रह्यो।
खेलको ६४ औं मिनेटमा रायन फ्रासरको पासमा जेम्सले गोल गर्दै आफ्नो ह्याट्रिक पुरा गरे। खेलको ७५औं मिनेटमा इरान जाहभीले गोल गर्दै खेललाई ३–२ को अवस्थामा ल्याउँदै खेलमा फर्कने संकेत दिए। तर, त्यसपछि कुनै टिमबाट थप गोल निस्कन नसक्दा स्कटल्यान्ड ३–२ ले विजयी भयो।
यो जितपछि स्कटल्यान्डले नेसन्स लिगका दोस्रो चरणमा स्थान बनाउनुका साथै सन् २०२० को युरोकपको लागि प्ले अफमा स्थान बनाउन सफल भएको छ।