युइएफए नेसन्ल लिग फुटबलमा बेल्जियमले स्वीट्जरल्यान्डसँग लज्जास्पद हार बेहोरेको छ।
लुजेर्नमा खेलमा घरेलु टोली स्वीटजरल्याण्डले बेल्जियममाथि ५-२ को फराकिलो जित निकालेको हो।
स्वीट्जरल्यान्डको जितमा हरिस सेफेरोभिचले ह्याट्रिक पूरा गर्दा रिकार्डो रोड्रिग्वेज र निको एल्भेडीले समान १-१ गोल गरे। बेल्जियमका थोर्गन हाजार्डले दुवै गोल गरेका थिए।
शुरूवातमा २–० को अग्रता लिएको बेल्जियमले स्वीट्जरल्यान्डसँग ५–२ को हार बेहोरेको हो ।
घरेलु टोलीविरुद्ध बेल्जियमले खेलको दोस्रो मिनेटमै थोर्गनको गोलबाट सुरूवाती अग्रता लिएको थियो।
खेलको १७ औं मिनेटमा थोर्गनले नै व्यक्तिगत दोस्रो गोल गरेपछि बेल्जियमले अग्रता दोब्बर पार्यो।
त्यसपछि घरेलु टोलीले उत्कृष्ट पुनरागमन गर्यो। रिकार्डो रोड्रिगेजले खेलको २६ औं मिनेटमा पेनाल्टीमार्फत गोल गर्दै घरेलु टोलीलाई खेलमा फर्कने संकेत दिए।
त्यसको ५ मिनेटपछि जेद्रान शाकिरीको पासमा हरिसले गोल गर्दै खेललाई २–२ को बराबरीमा ल्याए।
खेलको ४४औं मिनेटमा हरिसले व्यक्तिगत दोस्रो तथा टिमका लागि तेस्रो गोल गरेपछि स्वीट्जरल्यान्डले पहिलो हाफमा ३–२ को अग्रता लिन सफल भयो।
सुरूवाती अग्रता लिए पनि पछि परेको बेल्जियम खेलमा फर्कन सकेन। खेलको ६२ औं मिनेटमा निकोले जेद्रानकै पासमा गोल गरेपछि स्वीट्जरल्यान्डले खेलमा ४–२ को अग्रता बनायो।
८४औं मिनेटमा गोल गर्दै हरिसले ह्याट्रिक पुरा गर्दै स्वीट्जरल्यान्डलाई ५–२ को शानदार जित दिलाए।
यो जितसँगै स्वीट्जरल्यान्ड लिग ए को समूह २ बाट समूह विजेताको रूपमा नेसन्स लिगको सेमिफाइनलमा प्रवेश गरेको छ।
स्वीटजरल्याण्डसँको हारले बेल्जियम अगाडि बढ्न सकेन। दुवै टोलीको ४ खेलबाट समान ९ अंक रहेको थियो। तर गोल अन्तरमा स्वीस टोलीले बाजी मार्यो। अंक बिहिन आइसल्यान्ड रेलिगेसनमा परेको छ।
