क्रिस्टियानो रोनाल्डोबिनाको पोर्चुगल युइएफए नेसन्स लिग फुटबलको सेमिफाइनलमा प्रवेश गरेको छ ।
नेसन्स लिग अन्तर्गत गए राति इटालीसँग गोलरहित बराबरी खेल्दै पोर्चुगल एक खेल अगावै समूह विजेताका रूपमा अन्तिम चारमा प्रवेश गरेको हो।
लिग ए को समूह ३ मा रहेको इटाली समूह उपविजेता बन्दा पोल्यान्ड भने पुछारमा रहँदै रेलिगेसनमा पर्यो।
घरेलु मैदान मिलानमा इटालीले गोल गर्ने राम्रो मौकालाई सदुपयोग गर्न नसक्दा बराबरीमा रोकिन पुग्यो।
खेलको पाँचौ मिनेटमा नै इटालीले अग्रता लिने मौका खेर फालेको थियो। चिरो इम्मोबिलेले चार यार्डबाट गरेको प्रहार क्रसबारमा लागेर फर्किएको थियो।
दोस्रो हाफमा घरेलु टोलीले बल नियन्त्रणमा राखे पनि गोल गर्न सकेनन्।
पहिलो हाफको तुलनामा दोस्रो हाफमा पोर्चुगलले केही अवसर पाए पनि सदुपयोग गर्न नसक्दा खेल गोल रहित बराबरीमा सकियो।
रसिया विश्वकपपछि क्रोएसियाविरुद्धको मैत्रीपूर्ण खेलयता विश्राम लिने निर्णय गरेका रोनाल्डो पोर्चुगलले खेलेका पछिल्ला खेलमा अनुपस्थित छन्।
रोनाल्डाको अनुपस्थितिमा पनि पोर्चुगलले पछिल्ला ५ मध्ये ३ खेलमा जित हात पारेको छ। क्रोएसियासँग १–१ गोलको बराबरीमा रोकिँदा त्यसयता पोर्चुगलले इटालीलाई १–०, पोल्यान्डलाई ३–२ र स्कटल्यान्डलाई ३–१ ले पराजित गरेको थियो।