साविक विजेता म्यानचेस्टर सिटीले इंग्लिस प्रिमियर लिग फुटबलमा फराकिलो जित निकाल्दै शीर्ष स्थानमा उक्लिएको छ।
आइतबार राति घरेलु मैदानमा साउथह्याम्पटनलाई ६-१ गोल अन्तरले हराउँदै सिटी शीर्ष स्थानमा पुगेको हो।
सिटीको जितमा रहिम स्टर्लिङले दुई तथा सर्जियो अग्युरो, डेभिड सिल्भा र लोरी सानेले एक एक गोल गरे।
सिटीले एक आत्मघाती गोलको उपहार पाएको थियो। साउथह्याम्पटनका वेस्ली होएड्टले आत्मघाती गोल गरेका थिए। यस्तै ड्यानी इन्ग्सले साउथह्याम्पटनका लागि एक गोल फर्काए।
खेलको छैठौं मिनेटमा सिटीले वेस्लीको आत्मघाती गोलबाट अग्रता बनाएको सिटीले १२ औं मिनेटमा अग्युरोले गोलमा अग्रता दोब्बर बनायो।
१८ औं मिनेटमा सिल्भाले गोल गर्दै सिटीको अग्रता ३-० को बनाए ।
खेलको ३० औं मिनेटमा साउथह्याम्पटनका ड्यानीले गोल गर्दै खेल ३-१ को स्थितिमा ल्याए। त्यसपछि खेलको ४५ औं मिनेटमा स्टर्लिङले गोल गर्दै पहिलो हाफमा सिटीलाई ४-१ को अग्रता दिलाए ।
दोस्रो हाफमा सिटीले थप दुई गोल गर्दै फराकिलो नतिजा आत्मसाथ गर्यो।
खेलको ६७ औं मिनेटमा स्टर्लिङले गोल गर्दै सिटीलाई ५-१ को अग्रता दिलाए। त्यसपछि खेलको ९० औं मिनेटमा सानेले गोल गर्दा सिटीले ६-१ को फराकिलो जित निकाल्न सफल भयो।
यो जितसँगै सिटी ११ खेलबाट २९ अंक जोड्दै शीर्ष स्थानमा छ। दोस्रो स्थानको चेल्सीको २७ अंक छ। पराजित साउथह्याम्पटन ७ अंक जोडेर १६ औं स्थानमा छ। तेस्रो स्थानमा रहेको लिभरपुलको पनि समान २७ अंक भए पनि गोल अन्तरमा पछि परेको छ।
